ORANJESTAD(AAN):—E dos botonan di Aruba “Glamar” y “Maina” keto bai ta den man di autoridad Venezolano. Mientrastanto e cuater sospechosonan tambe ta tras di trali.
Autoridad venezolano a capta tres boto. Un di nan a logra huy cu velocidad halto pero e otro dosnan di Aruba si no tabata tin mesun suerte. A listra e boto pa droga pero no a haya droga.
E boto Glamar tabata tin e hombernan Andre Ramirez di nacionalidad Hulandes di 20 aña obrero na Aruba biba den Noord mientras e otro ta Sygmar Richard Clemencia di 35 aña trahando como arkitecto y biba den Tarabana den Appelsinastraat.
Riba e boto Maina tabata tin e hombernan Johannes Span Ospina di 28 aña, casa y biba na Wayaca Residence y ta comerciante. Asina el a bisa autoridad venezolano.
Hunto cune den e boto tabata tey Gerald Dalrymple di 44 aña traha como mecanico y biba den Fiyostraat.
Diario tabata tin contacto cu autoridad venezolano y tambe cu coleganan di Nuevo Dia cu a conta nos tur loke a sosode. A listra e boto pero no a haya señal di droga.
E botonan a keda gara den un marduga dia 28 di mey ultimo na Cabo San Roman di Peninsula di Paraguana.
Ta sospecha cu lo tabata kier a tira contrabando pero cos a bai malo y e otro embarcacion a logra huy. E boto Maina ta bon conoci na Aruba pa contrabando di arma. Dia 12 di Maart 2007 e mesun homber Ospina a cay sera cu cuater arma y basta bala den e boto.
Recien el a sali di prison y a perde hunto cu un hoben femenino entre Aruba cu Venezuela. Pa suerte a haye. Awor ta autoridad Venezolano tin Ospina wanta. Por a mira cu a haya cierto cantidad di dollar y placa riba esnan abordo.
Tin di nan cu te hasta tabata indocumenta. Diario tabata tin foto ainda di e armanan y e boto tambe tempo cu a haye na Aruba. Dia cu a haya arma abordo huez a debolbe e boto bek na e doño Ospina.
E biaha aki no ta conoci si esnan deteni lo haya boto bek. Na Aruba Diario tin informacion cu autoridad tabata sa cu e dos botonan a bai y a keda di warda nan bin bek pa ataca nan.
Esaki no tabata necesario pasobra autoridad Venezolano mes a pone man riba nan den e marduga di dia 28 di mey.
