Home General Gobierno kier pasa un ley pa por cuminsa parti permiso di casino...

Gobierno kier pasa un ley pa por cuminsa parti permiso di casino pa loco

30
0
SHARE
- Advertisement -

ORANJESTAD (AAN): Net prome cu eleccion na September proximo, Gobierno ta haciendo todo por todo pa pasa un ley den Parlamento den cual ta cambia e forma cu ta duna permiso pa opera casinonan, etc.

Ya algun luna pasa caba tabatin un persona liga na e Gobierno aki cu tabata cana cu un carta den su man indicando cu e lo haya un permiso pa opera casino. Esaki contra tur ley, pasobra manera tur hende sa, pa haya permiso pa un casino e mester ta mara na un hotel cu tin mas cu cierto cantidad di cambernan. Esaki ta pa sigura cu ta habri casino solamente den hotelnan grandi y cu tin suficiente camber pa por mercadea e casino den dje.

Te cu awor, tur casino ta mara na un hotel y si no tin camber di hotel no tin permiso pa casino tampoco. Claro cu asina Gobierno no por parti permiso pa loco tampoco y esaki riba su mes ta stroba e ideanan di por parti mas permiso tambe.

Pesey, den forma urgente a cuminsa pensa den institui un “Gaming Board” cu lo bira e instancia cu ta supervisa casinonan y ta otorga permiso tambe. Gobierno ta purbando pa bende pafor cu esaki ta un necesidad pa cumpli cu leynan internacional.

Den e proceso nan no ta bisa cu ningun instancia internacional no por conseha Gobierno pa cuminsa habri casinonan den tur skina di nos isla manera cu ta oficina di catochi ta habriendo.

DIARIO a tende cu e asunto aki a bira topico di discusion cerca e hotelnan te cu AHATA lo a manda un carta pa henter Parlamento pidiendo nan pa no pasa e ley aki. Rob Smith a confirma cu AHATA a manda un carta pa Parlamento, argumentando cu “AHATA a manda e carta na Parlamentarionan pasobra nos a wordo informa cu e ley aki tabata poni riba agenda di Parlamento pa e siman aki. E cambionan proponi den e ley aki ta encera cu e Gaming Board lo tin e potencial di permiti pa habri casinonan den cualkier bario y den tur skina. Esaki no mester ta preocupacion solamente pa e hotelnan, pasobra separa di e problemanan social cu e maneho aki lo causa, e lo tin consecuencia pa e trahadornan den sector di casino tambe”.

AHATA a conta nos cu e fenomeno aki ya ta bisto caba awendia cu binimento di demasiado restaurant riba Aruba. Por a mira cu varios di nan mester a sera nan portanan forsa debi na e sobre populacion di restaurantnan pa cu nos isla. Tin demasiado restaurant, mas cu nos isla por carga.

Tambe ta sinti cu Gobierno no ta conciente cu ora bini cu ideanan asina pa habri mercado pa mucho mas casino, cu nan ta hinca e trahadornan cu ta depende riba tips den un posicion dificil y ta pone nan pan na peliger.

Pero ta parse cu e fraccion di MEP den Parlamento a sinti e cayente ta biniendo y Parlamentario Marlon Werleman mesora a contesta cu e ley ta poni “on hold” te cu un proximo aviso y cu Parlamento lo re-evalua e ley aki.

Ta obvio cu Gobierno kier a purba pusha pasa e ley aki den 5 speed mientras cu Raad van Advies a duna conseho negativo pa e cambionan proponi den e ley aki. Tambe e Parlamentario a manda informa AHATA cu ta tene cuenta cu e situacion economico dificil cu mundo henter ta aden awendia y cu Aruba no ta un excepcion.

Marlon Werleman di MEP ta compronde pues cu si e situacion ta asina malo y Gobierno bin cu cambionan asina drastico cu consecuencia devastador pa e sector di hotelnan en general casino y hotelnan en general, cu e lo no yuda e economia di Aruba tampoco.

DIARIO lo vigila e asunto aki masha di cerca pasobra den e dianan aki hende no por sera wowo ni un seconde pasobra e hendenan aki ta core pasa pueblo un “fastball” den dia cla.

- Advertisement -

DUNA COMENTARIO

Please enter your comment!
Please enter your name here