Trahadornan di ambulance cu cuater ora maratonico di reunion cu minister
ORANJESTAD(AAN): Un reunion cu pa hopi tempo tabata haci falta a tuma lugar diaranzon atardi na centro medico na San Nicolas. E trahadornan di ambulance pa algun tempo tabata tin diferente keho y cada biaha e tension tabata bira mas grandi.
Awor e problemanan aki ta wardando riba un solucion. Un solucion cu mester tuma lugar den un lapso di dos luna di tempo. E trabao di e personal riba ambulance ta uno cu ta rekeri hopi atencion y trankilidad mental y trankilidad laboral.
Nan trabao ta salba bida di hende y tur dia nan mes ta subi caya como profesional medico pa atende tur tipo di emergencia.
E dianan aki mes por a tuma nota cuanto incidente e personal di ambulance ta haya nan mes aden ora cu nan ta den emergencia.
E reunion cu a cuminsa 4or a termina casi 8or di anochi. Un reunion cu kizas tabata mira un final na horizonte pero cada biaha puntonan nobo tabata bin riba mesa.
Tur empleado a sa di deshoga nan mes. Minister tabata contento di por a topa cu e trahadornan di ambulance. Presente tabata tey tambe dr Trevor van Gellecum y tambe hefe di ambulance cu ta Rudolf Rafine.
DIARIO a conversa cu tur esnan envolvi den e reunion y awor e comunicacion entre esnan den e top di ambulance y trahadornan a conoce un trankilidad atrobe.
Spera cu e bon trabao sigui pasobra e comunidad sigur ta hopi satisfecho cu e bon trabao cu ta ser desplega door di e profecionalnan aki.
