Home General “Secta peligroso” dunando seminario obligatorio y alaves dudoso na studiantenan na Aruba

“Secta peligroso” dunando seminario obligatorio y alaves dudoso na studiantenan na Aruba

16
0
SHARE
- Advertisement -

ORANJESTAD (AAN): Pa algun dia caba tin informacionnan drentando na nos mesa di redaccion cu tin cosnan hopi dudoso ta pasando den Departamento di Enseñanza na Aruba. Mayornan ta yamando nos redaccion pa mustra ariba e hecho cu nan yiunan ta obliga pa atende un seminario pa nan por haya un studielening.

Algun di nan ta te hasta mustra ariba e hecho cu e instituto tras di e seminarionan aki tin origennan dudoso. E informacion cu nos ta hayando ta cu e instituto tras di e seminarionan y e seminario mes ta basa ariba enseñansanan di un grupo (algun ta yame “Secta”) cu yama “Insight” y na Francia e grupo aki ta bay bao di e nomber “Innergy”. Na Francia e grupo aki ta considera un “secta peligroso” pa e Parlamento di Francia for di 1996 caba.

SI E STUDIANTE NO PARTICIPA E NO TA HAYA STUDIE LENING

Si un persona mes kier bay e tipo di seminario aki, ta un cos, pero e hecho cu gobierno di Aruba, representa pa direccion di Enseñansa ta obliga e studiantenan pa atende e seminario aki ta algo di repudia. Den un carta manda pa studiantenan, coordinadora di e proyecto aki ta bisa, “Your attendance is mandatory as one of the requirements to be granted the ‘Aruba Lening’ to continue further studies. Attendance at all sessions is required as each session builds on the previous session.”

COSTO DI SEMINARIO: 1000 FLORIN PA CABES

Manera un cos cu esaki no ta suficiente, e studiantenan ta sali for di Aruba cu debe ariba nan cabes. E suma cu ta cobra pa e seminario aki, segun informacionnan cu nos ta dispone di dje ta Afls. 1000.00 pa cada studiante. E seminario no ta inclui cuminda, pero ta cuminsa 9’or di mainta y ta caba 9’or di anochi (12 ora) y ta dura 4 dia. Pa e 1000 Florin, ainda e muchanan tin cu trece placa pa cuminda of trece nan mesun cuminda. Den e carta ricibi pa studiantenan, e coordinadora ta splica cu mester “bring your lunch/dinner money to purchase your meal.”

CONFIDENCIALIDAD

Pa haci e asunto di “secta” mas serio ainda, e studiantenan tin di firma un formulario di confidencialidad. Segun e coordinadora di e proyecto pa direccion di enseñansa, studiantenan cu participa na e seminario aki no por papia cu ningun hende di e contenido di e seminario. Pa kico esaki ta algo asina importante y cu mester firma pe, ta keda un misterio. Loke ta resalta den henter e asunto aki ta cu na varios pais rond mundo ta mustra cu mester tin cautela cu e organizacion of secta aki.

GRUPO DI MAYORNAN PREOCUPA

Un grupo di mayornan preocupa a manda un carta rond cu ta mustra cu, segun nan, e seminario ta uno cu contenido psycho-analitico profundo. Algo cu ta trece preocupacion pa hopi mayornan di studiantenan cu ta preparando pa bay studia den exterior.

Nan preocupacion primordial ta e hecho cu e seminario obligatorio no ta pa siña e muchanan con pa maneha un budget financiero of un metodo di estudio. E seminario ta un manera pa influencia e muchanan di un manera cu no ta corecto den bista di hopi di nan.

CUANTO PLACA TIN TRAS DI E SEMINARIO AKI?

Segun informacion cu nos ta hayando, cu aki ta papia di alrededor di 300 mil pa 400 mil Florin. Si tuma na cuenta cu e seminario ta costa e studiantenan (via nan studie lening) 1000 Florin segun informacion cu nos ta dispone di dje, y tin mas di 300 studiante cu lo a participa na e seminario, por deduci cu aki ta papia di placa grandi. Ken ta haya e placa aki? Ki cualificacion e grupo, organizacion of secta aki tin cu ta haci nan merecedor di tanto placa? Esakinan ta cosnan cu pueblo tin derecho di haya sa.

Informacionnan cu nos ta hayando for di mayornan ta mustra cu e coordinadora den departamento di enseñansa ta un fiel siguidor di e seminarionan aki y tambe e minister concerni.

Poniendo e diferencia di opinion entre grupo di mayornan y departamento di enseñansa un banda, e hecho ta keda cu PARTICIPACION NO TA A BASE VOLUNTARIO, sino un OBLIGACION IMPONI PA GOBIERNO DI ARUBA, MIENTRAS CU TIN DUDA SERIO SI TIN BASE LEGAL PA ESAKI. Maramento di un studilening na algo asina aki, ta algo cu por trece dificultadnan serio den corte di husticia.

ULTIMO INFORME

For di fuentenan fidedigno nos ta hayando informacion cu a core haci cambionan di ultimo ora pa mustra cu e seminario no ta obligatorio mas. Aki, parce cu tin dudanan serio si e cos aki ta legal si of no, despues cu algun mayor a mustra cu nan lo a consulta cu nan abogado. Pero te asina leu cu nos por a determina, ningun studiante a worde informa cu nan no mester atende. Tur a sali afor ta bisa cu nan no tabata sa cu e “obligacion” a worde modifica. Sigur cu e caso aki lo tin un rabo largo. Lo ta bon pa obispado tuma nota di e situacion aki, pasobra aki ta trata di cosnan serio cu ta pasando y cu aprobacion di Minister di Enseñansa, Marisol Lopez-Tromp den nomber di gabinete oduber, gobierno di Aruba.

- Advertisement -

DUNA COMENTARIO

Please enter your comment!
Please enter your name here