Home Politica A ta copia di rapport ‘fantasma’ di Departamento di Labor cu ta...

A ta copia di rapport ‘fantasma’ di Departamento di Labor cu ta papia di 8 mil desempleado!

0
0
SHARE
- Advertisement -

ORANJESTAD(AAN)– Segun un comunicado di Comision Un Solo Aruba, e malesa di partido MEP di play santo y gaña hende ta pega masha lihe mes y un di e marioneta nobo di MEP a demostra esaki claramente.

Den e promer encuentro di un posibel candidato riba e lista geel (pasobra e no sa si e ta bay riba dje of banda di dje) cu prensa, e marioneta aki ya caba a bin cu un serie di mentiranan dilanti y tabatin e curashi di ataca Otmar Oduber.

Comision Un Solo Aruba a ripara cu e persona aki cu ta trahando na departamento di Labor y Investigacion, sea e ta hinca demasiado den politica cu no ta na altura di e rapportnan cu su departamento ta produci, of ta prefera di defende MEP y su maneho desastroso durante 8 aña largo caba bisando cu na Aruba solamente tin 800 persona desemplea.

E persona aki tabatin e curashi di bisa cu Otmar Oduber a inventa un rapport cu ta menciona riba 8 mil desempleado na Aruba y a tribi hasta di ret’e dunand’e 24 ora pa presenta esaki.

Wel, esey ta 10 punten pa curashi y -20 pa gaña, pasobra e rapport fantasma cu e aspirante na politico aki ta bisa cu no ta existi, ta preto riba blanco, y aki por mira un copia di dje caminda ta menciona specificamente cu e grupo di werklozen (desempleado) ta 8.318 persona!

E rapport riba pagina 5 ta bisa exactamente: E grupo restante (desempleado) ta e ora 8.318 persona. Esaki nos a indica como esnan cu ta sin trabou. Di e grupo di persona aki tin un total di 784 persona registra cu ta sin trabou y ta buscando trabou. Esaki ta 9% di e total di desempleadonan.

E rapport aki yama ‘Analyse werkloze werkzoekenden en inactieven op Aruba per september 2008’ y a wordo presenta pa departamento di Labor y Investigacion y no dor di AVP. E propio departamento di gobierno ta ilustra cu e grupo di desempleado na Aruba ta 8.318 y cu solamente 800 a registra na Job Center, mustrando asina e falta di confianza cu e personanan aki tin den funcionarionan manera e exponente di MEP, cu en bes di yuda hendenan haya trabou, defende nos trahadornan di abusonan cu ta tuma lugar, ta prefera di bin gaña pueblo cu na Aruba tin solamente 800 desempleado.

Esey ta un berguenza masha grandi mes y ta demostra cu e cuasi candidato a drenta e partido corecto cu ta pas cu su pensamentonan, esta e partido cu ta para pa friends & family y no pa pueblo.

Comision Un Solo Aruba no por keda sin menciona cu e rapport aki, mirando e cifranan desastroso pa gobierno, nan kier a wante scondi y na ningun momento kier a presente na pueblo. Ta un di e trahadornan mes di Departamento di Labor, cu ta fada y harta cu e situacion desastroso cu ta tumando lugar, a duna Otmar Oduber esaki den su man p’asina habri wowo di hende cu ainda tin e bril di palo bisti.

Wel, marionetanan di MEP por purba tapa e berdad, pero lat of trempan esaki ta bin dilanti y Otmar Oduber hunto cu su demas coleganan di AVP lo sigui bin cu esaki, nan gusta of lag’i gusta!

- Advertisement -

DUNA COMENTARIO

Please enter your comment!
Please enter your name here