Home General Aruba ta kibra record cu e wela di mas hoben na mundo

Aruba ta kibra record cu e wela di mas hoben na mundo

7
0
SHARE
- Advertisement -

ORANJESTAD (AAN): Akinan na Aruba no por sinti nos mes hopi orguyoso di ta un isla hopi sigur y cu nos ta worde privilegia cu un beyeza natural inigualable. Ademas di ta un isla pacifico y cu un turismo di calidad excepcional.

Pero di algo cu si nos mester ta masha spanta cune ta pa e hecho cu na nivel internacional tin datonan nada alentador ta circula tocante nos isla.

Ta trata akinan di estadisticanan alarmante y cu ta un muestra di e situacion social-economico cu nos ta bibando den dje.

Kico bo lo pensa si nan conta bo cu na Aruba un mucha muher di 26 aña ya caba ta wela? Sigur cu esey lo ta algo hopi dificil pa kere pero cu ta un realidad.

Segun informenan suministra pa e Presidente Regional di UNICEF pa America Latina y Caribe, Nils Kastberg cu recientemente tabata na Aruba y cu a reuni cu diferente instancia como cu politiconan di nos isla, Aruba tin e record cu e wela mas jong na mundo cu un edad di 26 aña.

For di basta tempo caba ta bin ta papiando di e problematica cu nos isla ta confrontando relaciona cu e muchanan cu ta activo sexualmente for di un edad tempran y cu como consecuencia di esaki ta sali na estado.

Por papia akinan di mucha muhernan cu ta worde abusa sexualmente y cu ta haya yiu di nan propio tata, padrastro, omo, welo, cualkier otro familiar of personanan ayega na e famia.

Nos ta papiando akinan di casonan masha tristo y lamentable cu no solamente ta sosode na Aruba pero rond mundo.

Sinembargo, den e caso di Aruba, UNICEF tin datonan cu ta mustra cu di ta record mirando cu e mucha muher aki actualmente tin 26 aña y ya caba a bira wela y cu por conclui logicamente cu su yiu muher tambe a haya baby den su pleno proceso di adolescencia of casi cabando cu su epoca di infancia.

Datonan hopi importante a ser trece dilanti durante e reunion aki cu e representante di UNICEF cu mester bin dilanti pa asina comunidad di Aruba haya sa, for di fuentenan externo y obhetivo, kico ta pasando na Aruba y cual ta e caminda cu nos mester sigui.

No tur biaha tur cos ta bin dilanti akinan na Aruba. Tin datonan masha alarmante cu mester sali na luz publico. Algo structural mester wordo haci lihe pa drecha e situacion social cu ta den deterioro y ta alarmante.

- Advertisement -

DUNA COMENTARIO

Please enter your comment!
Please enter your name here