Home Politica AVP ta mira urgencia den sostene cuerpo policial

AVP ta mira urgencia den sostene cuerpo policial

4
0
SHARE
- Advertisement -

ORANJESTAD(AAN)– Criminalidad na Aruba a yega proporcionan nunca bisto. Aruba ta para na un cruzada caminda cu e escogencianan cu e tuma for di awor y padilanti lo ta determinante pa su futuro. Si keda e mesun direccion, nos pueblo dificilmente lo por saca su mes for di e abismo cu actualmente e ta drentando si cos keda manera e ta na e momentonan aki.

AVP a haya den su poder un raport cu a wordo traha pa S.P.A. cu ta trece dilanti cu cosnan ta bayendo robez den Cuerpo Policial. E preocupacion di mas grandi ta e manera cu na Aruba, na e momentonan aki, ta wordo trata cu hendenan den cuerpo policial. E raport, titula “Ta Basta, Respeta Nos Derechonan” cu ta un titulo cu ta bisa hopi.

E raport ta describi e situacion preocupante cu trahadornan di cuerpo policial ta aden. Adicionalmente, cu trabou di polis ta encera stress constante, pa motibo cu e trabou ta uno peligroso, ainda e personal di e cuerpo tin di ta preocupa cu e maltrato cu nan ta haya for di gobierno relaciona cu nan trabou.

Mike Eman di su parti tabata di bishita na warda di polis na Playa pa asina combersa y conose e situacion preocupante un poco mas di serca. Na su salida nos a combersa cu e lider di partido AVP, cu a splica cu “cuerpo policial ta sinti cu na e momentonan aki e motivacion di tur esnan cu mester ta ariba caya pa proteha nos ciudadanonan lo wordo hopi afecta pa e situacion di Cuerpo Policial.”

Aki por pensa ariba “nan compensacionan financiero, condicionan di trabou y tambe e posocion huridico di cada miembro di cuerpo policial. Hopi bes nan ta traha oranan largo, bou di riesgonan grandi, tratando di tene nos pais sigur y hustamente na e momentonan aki cu por mira cu e situacion di criminalidad ta aumentando den un forma severo den nos pais.”

Loke Mike Eman ta trece padilanti ta e hecho cu net na momento nan cu e Cuerpo en general mester di nan focus ariba nan trabou, nan ta haya nan mes confronta cu asuntonan cu ta afecta nan financieramente cu consecuencianan pa seguridad social, pero tambe familiar entre otro. E tipo di distraccionan aki ta loke henter Cuerpo Policial lo ta prefera di no tin cu usa nan tempo pe. E focus ariba nan trabou lo beneficia un y tur.

Sr. Eman a mustra tambe ariba e hecho cu tin un problema grandi den e Cuerpo cu e sistema actual di rango, caminda cu ‘bevorderingnan’ ta canando hopi atras. Ora tin di traha oranan extra, tambe ta un problema cu no por paga Polis pa e trabounan extra cu nan ta haci. Di otro banda, si ta pidi Polis pa traha oranan extra constantemente.

Lider di e partido Berde ta mustra ariba e realidad cu, “si nos kier un Cuerpo Policial motiva, na prome lugar Gobierno tin cu cumpli cu miembronan di Cuerpo Policial, percura cu recompensacion ta wordo haci segun ley, cu nan ta haya nan bevorderingnan segun loke ley ta bisa y cu na e momento cu nan tin derecho ariba cierto toelagenan, cierto “overurenan” cu nan ta haya esakinan tambe. Asina aki, esnan cu ta duna guia, por exigi mas atencion, mas motivacion y mas prestacion.”

Loke mester cambia, segun e lider di e fraccion mas grandi den Parlamento di Aruba, ta e hecho cu e maneho mester ta cla y transparente for di ariba. Ministernan mester tin un maneho mas conherente pa loke ta trata e Cuerpo Policial y nan compensacionan. Pero na e momentonan aki e maneho no ta coherente y no tin como meta pa motiva e miembronan di e cuerpo pa haci nan trabou cu mas atencion.

Combersando cu miembronan di Cuerpo Policial por a sinti un preocupacion grandi pa e situacion di criminalidad cu ta creciente na Aruba, pero en particular cu e situacion di Choller y “Hotel Central” den Playa. Segun hopi di miembronan di Cuerpo Policial, e presencia di e lugar aki den centro di un ciudad ta origen di hopi problema pa nos pueblo, pero particularmente pa nos industria turistico tambe.

Na Curaçao, hopi hende sa di con a ataca un situacion similar di adictonan problematico. E ta practicamente inusual pa wak Chollernan ta cana rond den ciudad na Curaçao, pasobra nan ataca e problema na un manera hopi efectivo. Aki na Aruba ta parce cu e solucion ta laga su mes warda pa motibonan cu no ta tur hende por compronde, maske cuanto nan purba di compronde. “Na Aruba, minister di Husticia y minister di Salubridad Publico a faya barbaramente den esaki.”

Sr. Eman a sigui bisando cu “e ta un prioridad pa AVP. E adictonan ariba caya aki, mester tin un solucion pa nan y nos lo presenta esaki tambe den e plan, Aruba Ariba, cu nos lo prensenta dia 23 di Juli den e Congreso di AVP. Den e plan tin atencion special pa e trankilidad por wordo reestableci den nos Pais.

- Advertisement -

DUNA COMENTARIO

Please enter your comment!
Please enter your name here