Home Politica Crisis economico y social na Aruba

Crisis economico y social na Aruba

4
0
SHARE
- Advertisement -

ORANJESTAD(AAN)– – “Aruba mester di un cambio di gobernacion hopi rapido. Un cambio cu lo duna empresanan y e pueblo seguridad atrobe. Un cambio di gobernacion ta e unico remedi y forma pa ataca e crisis grandi cu nos ta enfrentando na e momentonan aki”, palabranan fuerte di lider di partido AVP mr. Mike Eman.

Mike Eman a habri e conferencia di prensa semanal di partido AVP bisando cu e kier a dedica henter e conferencia di prensa na e situacion hopi grave pa loke ta Aruba su desaroyo economico y su futuro dor di e situacion dramatico di nos refineria Valero. Cada ora cu pasa empresanan cu ta trahando den Valero ta notificando hopi empleado cu no tin trabou mas pa nan.

E cantidad di empleadonan aki ta cu ta wordo manda cas ta creciendo. Algun tempo pasa tabata parce cu tur hende cu tabata traha directo cu Valero tabata sigur di nan trabou pa tres luna, pero den e ultimo dianan ta parce cu e situacion ta hopi grave y e ta empeorando.

Esaki ta masha preocupante mes. Esaki ta pone cu nos tur mester haci nos mes e pregunta fundamental kico pa haci pa ainda rescata e refineria, pa asina nos no haya un dobel crisis aki na Aruba.

Na e momentonan aki nos ta enfrentando un crisis basa riba 8 aña di negligencia di parti di e gobierno aki pa loke ta trata e desaroyo economico, e desaroyo infrastructural y e desaroyo di educacion di nos pais.

Nos ta mire den e perdida grandi di poder di compra, nos ta mire den e pobreza creciente y tambe e ta wordo mira den e crisis social den nos hogarnan pa motibo di e presion economico dor di tur medidanan cu e gobierno aki a tuma.

E crisis social aki ta causa di un gran cantidad di problema familiar. Nos ta mira hopi hoben ta haya nan mes ta bandona scol. Otronan cu hopi dificultad pa mantene un desaroyo sano dentro di famia. Esaki ta pone presion grandi riba e famia.

E negligencia di parti di gobierno durante e ultimo 8 añanan ta keda refleha den e crisis. E ex director di Banco Central a yame: De fysieke en sociale verpaupering van Aruba”. Bo ta mire den edificionan cu a deteriora, casnan den condicionnan hopi malo, careteranan sin ningun cuido y bo ta mira un impresion general di e producto Aruba den un decadencia.

Tur esaki pa motibo di 8 aña di un gobernacion malisimo caminda recursonan grandi di e pais aki a wordo usa pa promove e posicion financiero di “Friends and Family” a custia di e futuro di e pais aki.

Hunto cu e crisis grandi aki nos ta mira den industria turistico caidanan grandi di entrada pa locual ta e “revenue per available room”. Na luna di maart di e aña por ehempel e cantidad di persona cu a bin Aruba como turista tabatin un caida di 22%.

Un crisis social economico grandi y un crisis economico empeora na e momentonan aki pa negligencia dor di 8 aña di mal gobenacion y dor di e desaroyo internacional y riba dje nos ta haya un crisis relaciona cu decisionnan cu Valero ta tumando.

Unda bo bai y bo analisa e desaroyonan aki y bo mira kico ta e causa y e remedi bo ta yega na un solo conclusion: Aruba mester di un cambio di gobernacion rapido. Na unda nos lo sa kico ta bai ta e regimennan economico, fiscal, financiero social cu ta bai conduci e pais aki. Esaki pa duna empresanan y e pueblo Arubano e confiansa bek den futuro di e pais aki, Mike Eman a declara.

- Advertisement -

DUNA COMENTARIO

Please enter your comment!
Please enter your name here