Home Policial Madruga un teenager di 15 aña a haya morocho

Madruga un teenager di 15 aña a haya morocho

5
0
SHARE
- Advertisement -

baby1ORANJESTAD (AAN): For di basta dia DIARIO a bin ta papiando riba e situacion serio cu nos hubentud ta pasando aden. Tin casonan caminda ya caba a bati alarma na autoridad pa cosnan realmente lamentable cu ta sosodiendo den nos comunidad.

Algun siman atras nos a bin cu informacion alertando riba e hecho cu na Aruba tin e wela mas jong di mundo, locual no ta nada pa gaba ni haci fanfarea di esaki.

E casonan di embarazo hubenil na Aruba cada dia ta bay den aumento. Tin datonan di un mucha cu a sali na estado cu unicamente 11 aña, aki na nos isla y asina mes nos por sigui menciona mas ehemplonan.

Muchanan ta birando activo sexualmente na un edad hopi tempran. Tin casonan caminda muchanan ta drenta den actividad sexual door di no tin un guia di nan mayornan of pasobra nan a duna e mucha un mal ehemplo, entre otro casonan.

Tambe tin situacionnan caminda muchanan ta worde abusa sexualmente y pa haci e asunto mas lamentable ainda, nan ta sali na estado di nan propio tata, omo, welo, amigo di famia, etc.

Awor DIARIO a bin haya informacion cu un mucha muher di apenas 15 aña y cu apenas 6 luna di gestacion di morocho, den oranan di madruga di diadomingo a bira malo y cu ambulance mester a worde transporta pa hospital.

Durante su transporte, un di e criaturanan (mucha muher) no a alcanza yega hospital y a muri. E otro (mucha homber) si a sobrebibi, pero mas laat mester a traslade cu Air Ambulance pa Colombia ya cu su estado no tabata mucho bon. Un avioneta di Air Ambulance a bin di Bogota.

Ta trata akinan di un baby prematuro y cu poco posibilidad di sobrebibi mirando cu apenas e tabata na mitad di e periodo cu e mester a nace cu ta den promedio 40 siman.

Tambe banda di esaki DIARIO a haya sa cu e tata di e criaturanan ta e propio ruman di e mucha muher aki di 15 aña!

Ora di yega Aeropuerto, y cu a pone e baby prematuro den avioneta, ata un di e motornan no kier a start! Asina a cancela e viahe, y cu urgencia Ambulans a hiba e baby bek pa Hospital. Ironico di tur esaki, ta cu net banda di e Air Ambulance Colombiano, por a mira e Air Ambulance Arubano staciona, di cual Aviacion Civil tin grounded.

Esaki ta bira e di tres caso den mas o menos un luna caminda muchanan di poco edad, den e caso aki un baby, mester a worde hiba afo pa atencion medico.

E hecho ta keda cu ta reina un preocupacion grandi den nos comunidad pa e problematica aki di embarazo hubenil.

Mayornan tin e deber di educa y duna e yiunan tur e guia posible den loke ta nan educacion y formacion sexual. No mester laga otronan bisa bo yiu kico nan mester haci y con pa hacie. Ban spera cu e criatura aki por sobrebibi y bira un persona bon boluntad den nos comunidad.

- Advertisement -

DUNA COMENTARIO

Please enter your comment!
Please enter your name here