Home Politica Paketenan di oferta lo mester segura caranan nobo ariba lista di mep

Paketenan di oferta lo mester segura caranan nobo ariba lista di mep

7
0
SHARE
- Advertisement -

ORANJESTAD (AAN): Cu partido MEP ta mal para pa eleccion 25 di September 2009 tur hende sa. E pregunta grandi ta “con desastroso e derota di MEP lo ta”. Pero pa esey nos tin di warda e resultado di voto di pueblo den September venidero.

Pero mientras tanto Nel Oduber y MEP ta trahando duro pa segura cu e sla lo ta menos doloroso cu ta posibel. Caranan nobo ta subiendo lista di MEP, pero adhunto parce algun cu nan “incentivo”.

OFERTA DI PAKETE

Pa subi ariba cualkier lista di partido politico, tin algun exigencia. Pero esnan mas importante mester ta preparacion, un vision pa mehora Aruba, meta y tambe dedicacion y perseverancia.

Den MEP e exigencianan aki no ta asina cla. For di tur skina di Aruba, informacionnan ta drentando nos mesa di redaccion di personanan (hopi di nan conosi den comunidad) ta haya un “Pakete di Oferta” pa subi lista di MEP.

Mayoria di nan ta inclui un trabao den gobierno. Como ehempel por tuma e candidata recien ariba lista di MEP, St. Jago, cu parce a haya un trabao na departamento di asuntonan economico algun dia despues di a worde acerca pa Lider di Partido Nel Oduber cu e peticion pa subi lista di MEP.

CALIDAD DI POLITICO

Hopi a duda ariba e calidad di politiconan di ultimo añanan ariba lista di MEP. Aki por ehempel pensa ariba politiconan manera Junior Arends cu por ta un bon campañador of sushador di nomber, pero cu un aporte den parlamento practicamente nulo.

Cu e iniciativa nobo aki, Nel ta mustra cu aunke cu tin un moratorium pa aumenta e cantidad di ambtenaarnan den gobierno, cu campaña ta mas importante cu cualkier otro cos. Cu mañan deficit di Aruba subi atrobe, ta pueblo tin di paga mas BBO pa alimenta e peso financiero-economico cu e ambtenaar/politico-nan nobo aki ta costa pueblo pagador di belasting.

COMISION DI BON BOLUNTAD Y NAN INACTIVIDAD OF INCAPACIDAD

Loke observadornan politico ta mas preocupa cu ne, ta e hecho cu placa di pueblo ta worde usa pa metanan politico. Hopi di nan ta referi ariba e hecho cu MEP a nenga (te awor aki) pa firma e convenio di comision di “Bon Boluntad”. Probablemente MEP lo tin obhecion contra cu den e acuerdo tin specifica cu “Partidonan politico […] lo abstene di: nombracion y promocion di personal den servicio di gobierno, companianan estatal y/o institutonan publico cu metanan politico…” Por ta cu, ora cu Nel caba cu (of cumpra su) su lista, e lo ta dispuesto pa firma e convenio?

E frase aki den e convenio ta hacie masha inatractivo pa MEP pone su firma bao di dje. Un biaha mas MEP ta proba cu nan “Bon Boluntad” ta inexistente.

DESESPERACION PA CANDIDATONAN “FRESCO”

E ultimo 8 añanan MEP a goberna bou nivel, pero specificamente e ultimo 4 añanan e partido, lidera pa Nel Oduber a pasa “de rode lijn” den varios sentido. Booshi Wever ta ehempel bibo di e mal escogencia politico di Nel Oduber.

Marisol Lopez-Tromp a haya su mes involucra den un cantidad grandi di asuntonan bergonsoso y cu ta hole masha malo mes (e.o. ABUNDANCE NV). Redoblacion di debe di Aruba mester ta un di nan logronan mas grandi. Ora Hulanda ta papia di “Onderzoek” di corupcion na Aruba no ta por nada. Calidad di politiconan di MEP ta loke ta haci esaki posibel.

Awe, pa desesperacion pa candidatonan nobo, fresco y di calidad, a dicidi di bay over na “cumpra”. Hopi candidato potencial cu a worde acerca a worde priminti un “pakete di oferta” pa nan subi lista. Siman pasa ora cu Nel a bisa cu tin varios candidato di calidad cu lo subi lista di MEP, ta bira mas cu cla con Nel kier logra esaki.

FUTURO POLITICONAN Y FUTURO DI ARUBA

E manera cu un politico ta drenta politica ta determinante pa su futuro politico y futuro di e pais cu nan lo yuda goberna. Si e politico ta drenta pa conviccion of vision, e resultado por ta uno beneficioso y altentador pa su pais. Pero si for di un cuminsamento e politico ta drenta cu un “Pakete di Oferta” den politica, kico ta para di su conviccion y vision? Tur cos lo ta facil pa “cumpra”? Dios spaar Aruba.

- Advertisement -

DUNA COMENTARIO

Please enter your comment!
Please enter your name here