Home General Un promedio di 10 mil persona ya caba ta vacuna contra virus...

Un promedio di 10 mil persona ya caba ta vacuna contra virus di griep

2
0
SHARE
- Advertisement -

ORANJESTAD (AAN): Ayera un biaha mas por a nota cu cada dia mas y mas persona ta acudi na Departamento di Salud Publico pa asina haya e vacuna contra griep.

Segun DIARIO tin entendi tur dia e profesionalnan di salud ta hayando un cantidad considerable di hende cu ta acudi pa haya e vacuna aki. Segun informe, un promedio di 2 mil persona pa dia solamente na Playa ta e cantidad promedio.

Pa loke ta Playa y San Nicolas hunto cu por papia di un cantidad di 10 mil persona promedio cu a haya vacuna contra griep te cu aworaki.

Ta bon pa corda tur hende cu e vacuna aki ta protégé contra e virus cu di griep comun, esun di epoca cu ta circula tur aña. E no ta specificamente contra “Swine Flu”, aunke e tin den dje cierto tipo di proteccion tambe contra di e tipo di virus nobo aki.

Na e momentonan aki tin dos virus ta circulando, esun di griep comun y esun AH1N1 y e sintomanan di esaki ta casi mescos, esta tos, nistermento, keintura, verkoud, malestar general, falta di apetit y por ta diarea, entre otro.

DIARIO a haya sa cu aña pasa, AZV a aplica 22 mil dosis di e mesun vacuna aki na personanan di halto risico manera diabeticonan, esnan cu ta padece malesanan cronico, di pulmon, riñon, etc.

Na e momento aki, Departamento di Salud ta conta cu un donacion di 40 mil dosis cu a ser entrega door di Organizacion Mundial di Salud y e meta ta pa alcanza entre 80 y 90 porciento di e poblacion di Aruba.

Datonan cu DIARIO tambe a haya ta señala cu te na e momentonan aki tin un 30 porciento di e poblacion protegi contra griep comun door cu nan a haya e vacuna.

Practicamente, e poblacion di hende muher na estado ta protegi. Mester corda cu hende muher na estado ta cai den e grupo di halto risico y pesey hende muher cu mas di seis luna na estado tabata e grupo di prioridad pa haya e vacuna contra griep comun.

Awor e siguiente grupo y cu nos tin entendi lo haya e vacuna den e proximo dianan ta e grupo di muchanan.

Te aworaki, Departamento di Salud a aplica e vacuna contra griep na adultonan unicamente. OMS a manda prome un lote di vacuna pa e grupo di personanan adulto. Awor ta toca e muchanan pa haya esun special pa nan edad.

Parce cu ainda e siman aki of sino den transcurso di otro siman e vacunanan aki lo ta disponible na Aruba.

Departamento di Salud lo informa na su debido tempo ki dia e vacuna pa e muchanan lo ta disponible, den ki orario y na unda e muchanan lo mester ser hiba pa haya nan dosis y asina keda protegi.

Ta recorda esnan (adultonan) cu no a tuma e vacuna ainda pa acudi ya sea na Departamento di Salud na Playa, den Avicenastraat entre 8 am y 12 m.d. of di 2 pm pa 4 pm.

Na San Nicolas, na Centro Medico, tambe ta aplicando vacunanan na esnan pariba di brug of na esnan cu ta biba pabao di brug pero cu no ta alcanza e orario di mainta of atardi. Na Centro Medico e orario ta 24 ora non stop.

- Advertisement -

DUNA COMENTARIO

Please enter your comment!
Please enter your name here