Home General “Back To School”: Un dolor di cabes pa varios mayor

“Back To School”: Un dolor di cabes pa varios mayor

1
0
SHARE
- Advertisement -

ORANJESTAD (AAN) – Ayera atardi DIARIO a ricibi yamada di un mayor cu kier a elabora riba e inicio aki poco dia di e aña escolar nobo. Esaki den sentido cu e temporada “back to school” a bira un dolor di cabes pa su persona, y varios otro mayor cu e conoce cu ta den su mesun situacion.

Den su caso, un solo entrada tin den cas. Ta trata aki di un famia cu tin cuatro yiu den edad for di kleuter, school basico y cuminzamento di MAVO, unda cu e tata a perde su trabao y te ainda e no por a haya algo den e mercado laboral, mientras cu e mama ta gana apenas 500 florin riba un salario minimo.

E famia aki no por pidi ayudo na Departamento di Asunto Social pa e suma chikito cu nan ta aporta pasobra esaki ta pa mayornan cu no tin entrada y cu ta biba di bijstand.

Pero e tiki placa cu ta drentando cas no ta yega pa asumi tur e gastonan cu e famia tin, y riba dje cumpra tur loke e muchanan mester pa drenta school. Nan a paga basta cent na schoolgeld, pero loke ta paña, zapato, material cu tin cu busca na boekhandel, nan no por a cumpra pasobra e suma cu nan tin ta yega pa un di e muchanan so, y nan a duna prioridad na e yiu cu ta bay MAVO.

E mayor a conta nos cu esun cu a keda sin trabao a traha semper den administracion di un empresa di sector priva (Horeca) cu a corta personal, y unico opcion cu e ta hayando aworaki ta riba tereno di security, den cual e tin ni un tiki experiencia, ademas cu horarionan ta te madruga, cu tampoco e ta custumbra cune.

Pero e ta mira cu si e no tuma un trabao asina, pa un salario basta menos cu e tabata tin, e famia lo keda bay atras y specialmente e yiunan. Y como un tata responsable e ta haya su mes den e necesidad di bay traha den un tereno cu e no conoce y cu mester cuminza pa siña kico e ta encera.

Mientras tanto e placa cu el a haya di su trabao el a inverti un parti na paga un parti di hipoteca y otro parti riba su auto, tanten cu e no haya trabao y ta gastonan cu e mester sigui haci, y e ta cuminza como security te cu principio di October.

E mayor a yama na nos redaccion pasobra hopi di e trahadornan cu a worde retira di sector di horeca y comercial en general, aworaki ta pasando den hopi problema financiero, y tin di nan cu ta den depresion y hasta den momentonan di desesperacion, mirando cu school ta bay cuminza y cu e placa pa cumpli cu tur necesidad di nan yiunan no tey!

- Advertisement -

DUNA COMENTARIO

Please enter your comment!
Please enter your name here