5KM Boton Fun Run/Walk
ORANJESTAD (AAN) — Dia 29 di Augustus lo tuma lugar e di 5 Boton FunRun/Walk organisa pa ARRUWAC. E anja aki tin un cambio caminda e aktividad ta cuminsa y termina pabou di Macuarima School, dilanti e mini-market chines. E resto di e ruta ta keda mescos cu e añanan anterior, algo mas cu 5Km, lo bay direccion Boton, Maria Mai, San Fuego, Warawara y termina bek dilanti e mini-market chines.
E ta un ruta hopi trankil, no mucho trafico, caminda por disfruta tambe di nos bunita naturalesa y tambe un ruta cu tin dos pa tres subida cu ta reta e participante y atletanan pero cu lo judanan den mehoracion di nan condicion fisico.
Boton FunRun/Walk ta hopi gusta entre e canador y coredornan elitenan mirando cu e tin retonan manera mensiona y tambe pa e esnan cu kier disfruta un poco di e brisa di nos naturalesa y mehora nan condicion.
Inscripcion ta costa solamente AWG 5,00 y ta pa juda cubri e gastonan di e aktividad. Lo bay tin un waterpost ariba e ruta y tambe na final tur particpantenan por refresca y lo tin tambe patia.
Por inscribi solamente ariba e dia di aktividad y lo cuminsa pa 4or di atardi pabou di Macuarima school. Nos lo tuma tempo di tur participante na final.
ARRUWAC ta haci un invitacion general na tur hende pa bin participa y asina juda mehora bo condicion fisico y tambe juda baha e peso un tiki.
Tambe ARRUWAC ta recorda tur e canadornan cu dia 19 di September lo bay tin e competencia di canamento patronisa pa Bright Bakery cual lo bira un di e competencianan di mas grandi aki na Aruba.
Tambe ARRUWAC ta haci un apelacion na tur esan cu ta desea di juda cu e evento aki como jurado pa tuma contacto cu e directiva di ARRUWAC na tel: 594-1412, 593-5801 of 592-7234. Keda pendiente pa mas informacion tocante e Race-Walk patronisa pa Brigh Bakery.
