A bin descubri cu esnan di pariba di brug ta votando malo
ORANJESTAD (AAN): Diahuebs anochi den Club Bonaire tabata tin un reunion di mas cu 30 politico di distrito di San Nicolas cu lo ta den eleccion 2009.
Anthony Gario ta un di e organizadornan di e reunion aki cu nan tabata promoviendo fuertemente na cruzada di Drive Inn cu pancartanan grandi anunciando e reunion.
Anthony Gario a splica den entrevista cu DIARIO cu esaki tabata e prome di cuatrto forum cu nan tin cu candidatonan di pariba di brug pa nan expresa nan mes y pa nan papia cu pueblo di San Nicolas tocante diferente topico y desaroyonan cu nan lo kier wak.
E reunion aki tabata un charla, a señala, no un debate y no ta nada contra ningun otro partido. Conhuntamente e candidatonan di pariba lo a sinta y splica kico nan lo haci pa San Nicolas den e proximo cuatro añanan cu ta bin.
Na total, a bisa a invita 12 candidato di MPA, 5 di MEP, 5 di AVP, mientras cu di PPA a calcula 8. Democracia Real ta 4, MSI cu Sunum Bunum hunto ta 2 candidato. Mester a confirma e participacion di CURPA y un otro partido mas.
Na otro banda, Gario a señala cu e porcentahe di cada 10 habitante di San Nicolas, 7 ta vota pa un candidato di pabao. Ora cu despues di eleccion nan no a haya oido ta pasobra e hendenan no tey.
Automaticamente, un hende di Tanki Flip of Paradera cu a haya mil voto, ora cu e sinta den Parlamento e tin cu traha pa e bario di cual e ta, a manifesta.
Si cada bez nan ta votando pa e topnan di partido of pa lider di partido of pa un hende di diferente bario pasobra tin amor pa nan trabao, pero tog San Nicolas ta kedando atras compara cu e resto di Aruba, a laga sa.
Nan a sinta y a analiza e problema. Nan a bin descubri cu esey précis ta e problema. Cu nan ta votando malo. Nan ta votando pa un candidato di pabao. Un candidato di pabao tin cu drecha pabao tog. Si nan vota pa un candidato di pariba, e ta mas obliga di drecha pariba, a declara.
Segun Gario, e plataforma aki ta mas importante, y no su funcion como politico. Politico no ta unicamente esnan cu ta riba un lista. Politiek ta tur cos, a agrega. “Mi ta politico y e biaha aki mi ta plataforma ta mas grandi”.
