Home General Actualmente tin 55 caso confirma di swine flu na aruba y ni...

Actualmente tin 55 caso confirma di swine flu na aruba y ni un morto

13
0
SHARE
- Advertisement -

gellecumORANJESTAD (AAN) – Ayera atardi Departamento di Salubridad Publico a tene un conferencia di prensa, relaciona cu e situacion actual di Swine Flu na Aruba, y docter Trevor van Gellecum, director, a hiba palabra.

El a menciona cu despues di dia 24 di Juli cu el a sinta den un rueda di prensa, awor e ta bay duna un up date. Riba dia 24 di Juli a worde menciona cu tabata tin 560 melding, actualmente tin 702 total.

Tres siman pasa tabata tin 34 caso positivo y aworaki tin 52 caso confirma. Den e cifranan aki no tin ni un di hende cu por a fayece riba nos Isla, tabata tin un caso un tiki mas grave y segun un grafico cu van Gellecum a presenta, e tendencia ta cu prome e incidencia ta subi y despues ta baha bek.

“Pero locual ta importante ta cu nos ta sigui prepara, pasobra mundialmente tambe a worde menciona, cu tin riesgo cu ta bin un di dos wave. E prome wave nos a haye na Aruba y ban spera cu e di dos no ta bay sosode, pero mehor nos prepara pa fin di aña cu e di dos wave por bin”, dr. van Gellecum a subraya.

CON ARUBA TA PREPARA?
Docter van Gellecum a splica cu na Aruba nos ta prepara door di tuma e medidanan pa zorg pa nos salud ta den condicion optimal, loke ta importante. Tin cierto personanan cu ta cana cu mas riesgo cu ta esnan cu tin malesa cronico manera problema di curazon y di tracto respiratorio y otro malesanan cu ta pone nan sistema immune ta mas abao.

“Ban zorg pa proteha e personanan aki y no laga nan bay mucho den contacto. Si atrobe un ‘wave’ cuminza nos tur sa kico pa haci: keda na un distancia, evita bay den grupo, no tosa den hende nan cara, laba bo man, etc”, van Gellecum a agrega.

VACUNA
Director di Departamento di Salud a comenta cu nan a cuminza ofrece e vacuna cuminzando cu adulto. “Dos registracion nos tin, un di esnan cu a bin tuma e vacuna cu nos a registra, pero tambe nos ta conta e cantidad di vacuna, mas of menos binti mil cu a worde ofreci na adulto y un cantidad di casi dos mil cu a worde ofreci na e muchanan.

E muchanan ta esnan cu menos a bin, y ta importante pa nan bin busca nan vacuna. Edad di dos pa cinco aña ta esnan cu nos ta haya hopi importante. Pero nos ta ofrece vacuna te edad di 18 aña”, dr. van Gellecum a subraya.

El a agrega cu nan no tin tur dia di cada siman pa ofrece vacuna pasobra esaki ta crea cu ta bay bira hopi druk y trece presion riba e capacidad cu nan recurso humano tin, como coleganan.

“E ultimo tres simannan, mescos cu hopi hende na Aruba, nos a bisa ok pa cierto grupo den nos departamento tuma vacacion y bay descansa y wak pa prepara atrobe. Pero importante ta pa por fabor bin tuma e vacuna y esnan cu kier ofrece nan yiunan esaki”, dr. van Gellecum a indica.

El a aclarea tambe cu e vacuna cu ta worde ofrece ta esun di aña pasa, pues esun nobo no tine ainda. Esun contra H1N1 no ta existi ainda, el a menciona.

“Vacuna pa e mucha nos ta bay sigui te diabierna 21 cu ta mañan. Nos ta pidi pa por fabor bin tuma e vacuna di mainta te atardi na Departamento di Salubridad Publico y no keda warda te na ultimo ora of ultimo rato. Nos tin varios siman caba cu nos ta bezig ofreciendo e vacuna. Esun di adulto hopi hende tabata para aki afo, muchanan tin menos y esey nos ta compronde, y e ta un tiki mas complica pasobra tata, mama of e persona cu ta cria e mucha mester bin cune, pero por fabor hacie”, dr. van Gellecum a expresa.

CENTRO DI DIAGNOSTICO
Dr. van Gellecum a agrega cu aunke e casonan a aumenta e no ta na un forma drastico, y e Centro di Diagnostico a cambia su horario, pues awor e ta unicamente entre 1’ or pa 4’ or di atardi den siman. Esaki ta canando bon y por ripara cu e informacion rond di e tema aki ta un tiki mas trankil, pero esey no kiermen cu Salud Publico ta sinta haci nada, pasobra nan tin cu prepara por si acaso ta bin e di dos wave.

PERSONANAN DIABETICO
Dr. van Gellecun a haci un yamada na personanan cu ta sufri di diabetes (sucu halto) pa por fabor cuida nan curpa bon pasobra nan ta di riesgo pa e prome y di dos ‘wave’ H1N1.

Tambe personanan cu tin sobrepeso y ta importante pa traha riba esaki no awor pero continuamente y zorg pa mantene nos salud mas optimal posible pasobra esaki ta un aspecto tambe di prevencion.

- Advertisement -

DUNA COMENTARIO

Please enter your comment!
Please enter your name here