Home General Analisis Politico: “Horible…”

Analisis Politico: “Horible…”

12
0
SHARE
- Advertisement -

analisis_politicoORANJESTAD (AAN): Horible, horible loke Nel Oduber a haci cu nos pueblo y muy en particular cu e empleadonan di Valero y tur e contratistanan cu tabata traha den Valero. Nel Oduber y Nel Oduber so ta responsabel pa e drama cu ta pasa over di nos isla. Valero a bay pasobra nos tin un prome ministro cu solamente tabata wak e interesnan di su hendenan. Na tur por lo menos 6000 hende a perde trabao.
Horible un biaha mas pasobra esaki ta directamente y unicamente e falta di Nel Oduber. Na Februari 2007 Valero a propone gobierno di Nel Oduber pa e kita e BBO y pone un winst belasting y Valero a inverti 1 biyon Dollar den e planta pa renobe completamente. Aki no ta un caso cu circumstancianan mundial a cera Valero. Ta Nel Oduber a nenga e proposicion di Valero cu tabata un proposicion realistico y a garantiza Aruba un refineria moderno pa hopi aña bao di un companida grandi manera Valero.
Partido AVP a accepta e proposicion. Ta Nel Oduber a comete e crimen aki contra nos pueblo. No tin discusion cu e oferta di Valero tabata un proposicion tremendo pa Aruba. Ta solamente e haragan pa placa di Nel Oduber a pone 6000 hende sin trabao. Ta solamente pasobra Nel Oduber a kere cu Valero tabata bluf y cu e por a saca hopi mas placa for di Valero cu e 40 pa 50 miyon cu Valero kier a paga pa aña gana of perde placa.
Ta solamente pasobra Nel Oduber tabata kier mas placa pa parti cu su friends and family awe Valero ta cera. No tin palabra pa describi e acto horendo di Nel Oduber. Hopi biaha nos a yega di skirbi cu Nel Oduber ta bay tin un tempo hopi malo despues cu e worde baha pa loke e a haci cu nos pueblo. E martirio cu e a pone ariba nos pueblo lo no worde lubida nunca mas. No tin ningun splicasion acceptabel pa e desaster cu Nel Oduber a causa pa nos hendenan. Ya caba tabatin miles di famia na Aruba sufriendo seriamente pa motibo di e medidanan cu Nel Oduber a tuma pa keda celebra e fiesta di friends and family. Pa motibo di e mal gobernacion ariba tereno di turismo tin un cantidad di retironan ta mandando nos hendenan for di e hotelnan.
Despues di diabierna ultimo ora cu Valero a dicidi di pone un fin definitivo na su presencia na Aruba nos ta den un situacion dramatico simplemente pa motibo di un Nel Oduber. Ta con un criminal asina por kere cu e ta scapa despues di tur loke e a haci cu e pueblo di Aruba. Contra su oponentenan politico e tabata un burdugo cruel sin lo minimo di sintimento humano. Pa e pueblo e tabata pio ora cu e a pone un castigo incargabel ariba e lomba di esnan mas debil den nos comunidad. Un cantidad grandi di nos muchanan ta bay school sin come pa motibo directo di Nel Oduber.
Awo menos cu un luna prome cu eleccion Nel Oduber a dal e sla fatal na miles di nos conciudadanonan. Un sla directamente for di Nel Oduber. Esaki no por worde ripiti suficiente pasobra si Nel Oduber tabata tin maske ta un poco sinti pa nos pueblo ora cu Valero a haci e proposicion e mester a consulta cu hendenan cu sa pa tuma un decision responsabel. Ta solamente pa trata di haya mas placa di Valero e a tuma e decision di mata Valero. Por ta cu e siman aki den e caso di arbitrahe cu tin contra Valero gobierno ta gana y ta bay cobra un suma grandi di Valero.
Esaki lo ta un suma pa un biaha y pa motibo di e capricho egoista Aruba a perde su refineria. Nel Oduber su nomber lo worde pega pa semper na e drama aki. Valero cori for di nos isla pa e acto heroico di Nel Oduber pa purba di saca mas placa pa e friends and family for di Valero sin tene cuenta cu e miles di trahador Arubano. Horible y un biaha mas horible!!!!

- Advertisement -

DUNA COMENTARIO

Please enter your comment!
Please enter your name here