Home Economia Aruba ta den crisis!

Aruba ta den crisis!

5
0
SHARE
- Advertisement -

ORANJESTAD (AAN): Durante Congreso 2009 di partido AVP un di e discursonan cu mas a hala atencion tabata esun di Otmar Oduber caminda cu el a mustra cu nos isla ta den crisis y con turismo lo bira e solucion un biaha mas, pero un turismo cu ta haya e atencion y sosten debido for di nos gobernantenan.

Otmar Oduber a mustra cu na e momentonan aki nos turismo ta den crisis dunando ehempelnan palpabel pa demostra esaki. Tambe cu nos economia ta den crisis unda cu desde cu partido MEP a tuma gobernacion over na 2001, nan a tuma un gran cantidad di medida contra pueblo pa privilegia “friends & family”. Desde 2002 te cu 2007 poder di compra di nos pueblo a bay atras cu 26% pa motibo di e medidanan inhusto di gobierno.

Introduccion di BBO a conduci na un inflacion record di 10,2% na aña 2007. Mirando cu pa motibo di BBO e costonan di empresanan tambe a subi drasticamente y teniendo cuenta cu nan entrada a baha pa motibo di caida den consumo local y den turismo, un gran cantidad di empresa mester a cera nan porta of reduci e cantidad di trahador. Actualmente nos pais conoce mas cu 5 mil desempleado.

Oduber ta indica cu nos economia ta den crisis y gobierno ta simplemente ignora e realidad amargo cu esnan di menos recurso ta esnan cu mas ta worde afecta. “Ta obvio cu nos gobernantenan actual no tin sentimento social. Na e momentonan aki tin alrededor di 20 mil persona cu ta bibando bao di e bestaansminimum. Pues, 1 di cada 5 persona cu ta biba na Aruba ta bibando den pobreza”.

Igualmente el a indica cu nos pais ta confrontando su peor crisis socio-economico desde ciere di LAGO na 1985 y mirando e dependencia grandi di nos economia riba turismo, e solucion pa e crisis actual lo mester bin principalmente for di turismo. Y mescos cu tabata e caso e tempo aya despues di ciere di LAGO, awe atrobe partido AVP ta e prome yama pa rescata nos pais.

E meta principal di e plan di maneho di AVP pa cu turismo ta pa yena nos cambernan di hotel mas tanto posibel cu turistanan cu ta genera mas entrada cu ta posibel pa nos economia. Cu otro palabra: maneho di AVP lo ta dirigi riba turismo di calidad. E esencia di e maneho aki ta cu e ta enfoca riba e turista cu mas entrada.

Logicamente e tipo di turista aki tin exigencianan halto pa loke ta calidad di e producto turistico y calidad di servicio.

Recientemente Otmar Oduber a reuni cu un grupo di expertonan y baluartenan di nos turismo y e punto cu mas a resalta tabata cu durante ultimo añanan e calidad di nos producto y servicio a deteriora considerablemente.

Nan tambe, mescos cu partido AVP, a yega na e conclusion cu pa nos pais por ta exitoso den su strategia pa atrae turismo di calidad, e siguiente gobierno mester duna prioridad na mehoracion di calidad di e producto “Aruba” y tambe na mehoracion di calidad di servicio turistico.

Den e cuadro aki y teniendo cuenta cu mundialmente mas y mas viaheronana ta siguiendo e tendencia di “thinking green”, e maneho di partido AVP lo ta basa primeramente riba ecoturismo, cu ta necesario pa por salvaguardia nos herencia natural y cultural y pa garantisa un desaroyo sostenibel a largo plaso. Den e cuadro aki lo introduci leynan moderno pa proteha y conseva nos medio ambiente, flora y fauna.

Pa loke ta calidad di servicio, lo enfoca riba concientisacion di nos comunidad riba importancia di turismo y riba formanan con nos cada un por contribui pa haci e experiencia di e turista uno mas agradable y placentero. Ademas, lo introduci un programa di training y capasitacion pa tur esnan cu ta labora den sector turistico y otro sectornan liga cu turismo.

Durante e siguiente periodo di gobernacion y cuminsando desde aña 2010 e “receipts per visitor night” mester aumenta anualmente cu 5% compara cu e aña anterior. “E ta un meta ambicioso, pero cu sosten di henter nos comunidad y cu respet mutuo y cooperacion estrecho di nos partnernan local y internacional den turismo, mi ta convenci cu nos lo logre. E prome pasonan ya caba a tuma lugar den nos encuentro cu dirigentenan di Carnival Cruise Lines y American Airlines”, Otmar Oduber a duna di conoce.

Finalizando, e politico di AVP a ilustra pakico turismo di calidad ta asina importante pa desaroyo di nos pais. Si enfoca riba turismo di calidad, e ora no ta necesario pa sigui expande e cantidad di cambernan di hotel. Asina lo por mengua e necesidad pa importa trahadornan for di exterior y di e forma aki controla crecemento di nos poblacion.

Turismo di calidad ta importante tambe pasobra e ta nifica mas divisa pa nos economia, mas entrada pa sector hotelero, comercio y nos trahadornan, mas inversion priva y mas crecemento economico.

E ta conduci na un economia stabil y fuerte cu por carga un pensioen complementario pa tur trahador den sector priva. Ademas, e ta genera mas entrada pa gobierno cu por worde usa of inverti den turismo, den nos infrastructura, pa combati desempleo y pobreza, pa combati criminalidad, pa soluciona e problema di choller, pa mehora calidad di nos enseñansa y cuido medico, pa proteha nos medio ambiente y naturalesa, y “last but not least” pa compensa entradanan cu gobierno ta perde di haya na momento cu AVP elimina BBO.

AVP tin un plan concreto pa crea confianza atrobe den futuro. E plan ta contene tur e ingredientenan necesario pa maximalisa contribucion di nos industria turistico na desaroyo socio-economico di nos pais.

AVP ta compromete su mes cu despues di e victoria historico di 25 di september venidero nos lo ehecuta e plan aki integralmente. Pa hopi aña caba ta worde papia di turismo di calidad, y awor ta e momento pa nos acepta e reto, tuma accion y hacie realidad. Tribi, e cambio t’ey!

- Advertisement -

DUNA COMENTARIO

Please enter your comment!
Please enter your name here