Home Politica Autonomia no ta nifica Free For All

Autonomia no ta nifica Free For All

2
0
SHARE
- Advertisement -

Paul CroesORANJESTAD (AAN): Recientemente nos por a tuma nota cu contrincantenan politico ta usa como maniobra pa desvia atencion di problematica real cu nos tin na Aruba, e concepto di autonomia. Aruba ta confrontando retonan grandi, cu merece atencion awor. No mester usa sentimento y informacion robes pa kita atencion for di e situacion actual.

Mester comprende cu autonomia no ta nifica cu bo tin a derecho di haci locual bo kier of goberna pa algun so, y no pa henter un isla. Autonomia no ta dunabo e derecho di dicidi sin consulta of respeta reglanan vigente. Aruba ta forma parti di comunidad internacional cu tambe ta mara na reglanan y leynan internacional.

No ta asina cu nos no mester respeta leynan di medio ambiente, derechonan humano, leynan laboral, leynan contra labamento di placa, leynan di bon gobernacion y transparencia – contra corrupcion – cu ta reglanan internacional cu ta conta pa nos tambe. Autonomia no ta regala contractnan lucrativo na algun, pero ta transparencia den gobernacion!

Autonomia ta nifica e libertad, e resposabilidad y derecho cu cada pais, pa dicidi su propio direccion, pero mara na reglanan vigente. Autonomia ta nifica e libertad y resposabilidad di cada gobierno, pa tuma decisionnan pa tur ciudadano di Aruba, y no pa algun so. Ora cu ta papia di issuenan real nos mester pensa lo siguiente.

Autonomia cu nos tin mester worde usa pa resolve e siguiente retonan: (*) Caida den turismo 2009 di 10.7 %. (*) 3000 hende cu a perde trabao den sector di hotel. (*) Delincuencia y Ladronicia 56.000 caso anual.

(*) Un Shelter den centro di ciudad, cu a caba cu comercio. (*) Valero su posibel cierre cu tur consecuencia (500 contratista manda cas). (*) Gangforming bou di juventud. (*) Mal ambiente cu tin den Reino Hulandes cu e peliger di perde nos paspoort pa uno independiente. (*) Schoolnan den mal estado.

Reino Hulandes no mester ta un ring di boxeo, mas aun na e momentonan difícil aki cu Aruba ta confrontando. Respet y dialogo mester prevalece riba emocion y insulto y declaracionnan descabeya.

Si nos sigui den e direccion aki, y buscando conseheronan cu ta liga nan mes cu gobierno Venezolano y ta papia di recolonosacion – ainda den 2009 – nos ta core e peliger di perde nos autonomia y nos paspoort hulandes, y al fin haya un paspoort independiente of uno Venezolano.

Aruba na momentonan aki ta requiri hendenan honesto pa guia y forma nos futuro y mira e realidad cu tin na Aruba. Facil pa gaña y papia riba cosnan cu no ta relevante pa e eleccion aki, just pa haya un poco voto adicional. Aruba ta exigi personanan capacita, cu vision concreto unda Aruba mester ta y ki direccion nos mester tuma. No cu promesanan irrealistico di campaña, sino cosnan cu por worde cumpli y den un termino specifico.

- Advertisement -

DUNA COMENTARIO

Please enter your comment!
Please enter your name here