Home Politica AVP lo desaroya San Nicolas y vecindario turisticamente

AVP lo desaroya San Nicolas y vecindario turisticamente

4
0
SHARE
- Advertisement -

avp ORANJESTAD(AAN)— Segun parlamentrio Otmar Odubere, ta obvio pa un y tur cu, apesar di un gran cantidad di promesa di partido MEP, durante ultimo 8 añanan di nan gobernacion e distrito di San Nicolas a wordo neglisha completamente dor di e partido aki.

Na aña 2001 partido MEP a priminti entre otro cu e area di Seroe Colorado lo wordo desaroya den un resort area exclusivo, cu tur e facilidadnan pa pueblo di Aruba. Pero te dia di awe, 8 aña despues cu e promesa a wordo haci, ainda San Nicolas ta wardando riba su prome hotel. Ya pa 8 aña caba nos ta tende e mesun storia cu “e plannan ta basta leu”.

AVP ta compromete su mes cu desaroyo di e distrito aki, mescos cu tur otro distrito, lo haya e debido atencion.

Den nos programa di partido pa eleccion 2009, esta e plan “ArubA’riba”, AVP a distingui diferente prioridad pa e siguiente gobernacion. Un di e prioridadnan ta mantencion y mehoracion di e calidad di e infrastructura den tur distrito y bario.

Akinan ta menciona por ehempel restauracion di e centro di Playa y San Nicolas, construccion, mehoracion y mantencion di careteranan den tur bario y embeyecimento di lugarnan publico den tur distrito.

Ademas, den nos plan “ArubA’riba” ta wordo menciona cu pa loke ta trata e maneho relaciona cu turismo lo pone enfasis riba e desaroyo turistico di San Nicolas. Den cuadro di e maneho aki lo duna prioridad na e siguiente accionnan y proyectonan:

  1. Expansion di e “scope” di e proyecto di “tourism corridor” cu AHATA a presenta algun aña pasa, den sentido cu e ruta desde airport bay San Nicolas mester forma parti integral di dje.
  2. Inverti den embeyecimento di e atraccionnan turistico na San Nicolas y den mehoracion di e infrastructura den cercania directo di esakinan, manera e watertoren, e grotnan y diferente beachnan.
  3. Duna San Nicolas y su atraccionnan atencion special den e mercadeo turistico di nos pais, cu enfoke riba su aspecto unico Caribense.
  4. E “Soul Beach Festival” y tambe otro actividadnan cu tin como meta pa atrae turistanan lo wordo organiza na San Nicolas.
  5. Inverti den expansion y mehoracion di e infrastructura economico y social di San Nicolas pa esaki por facilita y sostene un desaroyo economico y turistico.
  6. Percura pa tin proyectonan cu ta suficiente yamativo pa por atrae turismo pariba di nos isla y di e forma ey crea oportunidadnan di trabao pa esnan cu ta biba na San Nicolas. E “Museo di Carnaval” ta un di e proyectonan aki.
  7. Den consulta cu e refineria mester laga haci un investigacion cientifico di e impacto ambiental y riba salud di e habitantenan di San Nicolas y formula un strategia con por minimalisa esaki.
  8. Explora e posibilidad y factibilidad pa construi un aeropuerto chikito na San Nicolas, esta un “commuter airport terminal”. E aeropuerto di San Nicolas lo ta destina solamente pa avionnan chikito tanto comercial como priva y pa primordialmente vuelonan regional, por ehempel di y pa Boneiro, Corsow, otro islanan Caribense, Venezuela y Colombia. Ta papiando akinan di mas o menos 100.000 turista pa aña, cu lo cera conoci directamente cu San Nicolas como area turistico.
  9. E aeropuerto nobo aki lo haci San Nicolas mas atractivo como lugar pa establece hotel y tambe otro tipo di negoshi liga cu sector turistico, manera restaurant, comercio y carrental. Pues e aeropuerto nobo lo tin un efecto di “spin-off” grandi riba desaroyo di San Nicolas y vecindario.

E plan di maneho aki ta contene tur e ingredientenan necesario pa converti e parti pariba di nos isla den un parti integral di nos producto y desaroyo turistico pa asina eleva calidad di bida di tur nos conciudadanonan cu ta biba “pariba di brug”.

- Advertisement -

DUNA COMENTARIO

Please enter your comment!
Please enter your name here