Home General Awe ta bay ta e dia mas bruha den historia di enseñanza...

Awe ta bay ta e dia mas bruha den historia di enseñanza na Aruba

4
0
SHARE
- Advertisement -

colegioORANJESTAD (AAN): Aña di school nobo lo mester ta un dia di celebracion. Un dia nacional di enseñanza cu nos ta celebra cu atrobe miles di mucha ta cuminsa of sigui cu nan educacion na school. Cu educacion ta remplasa ignorancia y cu conocemento y habilidad lo ta e forsa cu cual nos ta sigui construi nos bida y nos pais.

Cu schoolnan ta lugarnan cu ta duna nos muchanan gana di ta y cu ta inspira alumno pa studia y alimenta nan curiosidad. Cu ta stimula e creatividad di nos maestronan y duna nan satisfaccion den wak nan alumnonan crece. E prome dia di school e aña aki sinembargo lo ta lo contrario di un dia di celebracion.

Pa motibo di e maneho desastroso di Minister Marisol Lopez Tromp y e gobierno di MEP, awe ta bay ta e dia mas bruha den historia di nos enseñanza. Cu experticio di drs. Rene Herde, aki DIARIO ta presenta un resumen di e problemanan mas grandi den enseñansa awe ta lo siguiente:

(1) Hopi mucha den edad di 4 pa 18 aña no por bay school pasobra no tin lugar pa nan. Hasta muchanan cu mester bay school basico y kleuterschool. Un cantidad di mucha cu mester bay mavo no tin school. Un cantidad di alumno cu por y kier bay havo no por bay den dia y mester bay anochi. Hopi studiante cu kier bay school di anochi no por bay pasobra no tin lugar.

(2) Pa un cantidad di alumno cu a caba nan mavo, no tin ningun sorto di school disponibel. Nan trobel ta dobel! Nan no por bay havo pasobra no tin luga of nan no tin suficiente punto pa drenta havo. Nan no por bay EPI pasobra no tin lugar of no tin e ramo di studio cu nan kier. Nan no ta haya fianza pa studia afo, pasobra minister a stop esey. Nan no tin unda pa bay!

(3) Alumnonan di por lo menos tres school mester worde transporta den bus pa un of dos aña, di nan school bieu pa un otro school, pasobra no a planea e reconstruccion di school na tempo. Pero mas tristo ta lo siguiente: alumnonan di school basico Rosario College mester bay e school publico na Sabana Basora, pasobra tin cu drecha nan school cu ta den masha mal estado.

Pero e alumnonan di Colegio Felipe B. Tromp cu tambe mester sali di nan school pasobra e ta casi cai den otro, ta bay den bus pa e school di Rosario College. E alumnonan di Maria College mavo ta bay den bus pa e Centro Hubenil Washington. E coremento den bus ta bay dura te ora cu caba cu e reconstruccion di e schoolnan.

(4) E alumnonan di Colegio Arubano na San Nicolas ta bay haya les den e edificionan di YMCA y school di Arte na San Nicolas. Dos edificio cu sigur no ta adecuado pa enseñansa manera nos conoce na Colegio.

(5) Un cantidad di alumno no por bay school pasobra nan a bira mucho bieu, a keda sinta dos biaha of a falta school hopi y a perde nan lugar den school. Tin por lo menos un school cu tin un ‘lista di espera’ (wachtlijst) di alumnonan cu kier bay school. Nan lo haya turno si otronan cai afo.

(6) Un cantidad di alumno y studiante no por bay school pasobra nan y nan mayornan no por paga e costonan di school. E buki, material, seguro, placa pa airco y placa di school tur hunto a bira mucho halto pa hopi famia.

Y gobierno no a presenta ningun solucion. E consecuencia ta cu e alumnonan aki den e edad di 6 pa 20 aña no ta bay school. E costo di school a bira asina halto cu un cantidad di famia mester a haci fianza na banco pa paga e costo di school. Y gobierno no a presenta ningun solucion.

(7) E material di school no a yega. Hopi school mester cuminsa cu nada of casi nada na material, pasobra pa hopi school e material no a yega ainda. Sea ta cu e no a worde paga of a worde paga laat, pasobra gobierno no tabata tin placa pa esaki! Pa otro ‘cosnan’ si!

(8) Por lo menos un grupo di studiante di Universidad di Aruba no a haya nan placa di fianza pa studio pa nan por paga nan cosnan di school.

(9) Tin un cantidad grandi di persona cu no tin diploma di maestro di school ta bay duna les, pasobra di scracedad di maestro di school. Gobierno no tin ningun plan of solucion pa esaki. Minister mes ta sigui nombra hende sin diploma necesario den e function di ‘asistente di klas’ pa cua no tin un descripcion di e trabao, no tin control riba e trabao of training pa esnan cu tuma e trabao.

(10) Un cantidad di studiante a dicidi di bay Hulanda, pasobra no tin school pa nan na Aruba.

- Advertisement -

DUNA COMENTARIO

Please enter your comment!
Please enter your name here