Home Deporte COA conta pronto cu un comision di atleta

COA conta pronto cu un comision di atleta

0
0
SHARE
- Advertisement -

coa2ORANJESTAD (AAN)— Den e mundo Olimpico e atleta ta e persona central, esun cu ta na centro di tur aspecto di e maneho. E atleta ta e razon di existencia di organizacionnan deportivo. Dirigentenan tin como tarea pa sirbi prome cu tur cos e interes di e atleta, atravez di nan trabao den organizacionnan deportivo.

Den e Movimento Olimpico e voz di e atleta ta sumamente importante y ta wordo altamente balora. Tanto asina cu awendia tur Comite Olimpico Nacional tin e obligacion pa inclui den nan structura un Comision di Atleta.

Ademas di esaki, representacion di e Comision di Atleta mester tin acceso na e Asamblea General y tambe na Directiva di e Comite Olimpico. Pa Comite Olimpico Arubano e mensaje aki a wordo capta y den e statutonan di COA actualmente ta inclui e obligación cu, fuera di creacion di e Comision di Atleta, e Presidente di e Comision di Atleta ta forma parti di Directiva di COA.

Pa por wordo eligi como miembro di e Comision di Atleta, e persona mester a participa como atleta na un di e Weganan cu ta cai bou di responsabilidad di COA (Weganan ODESUR, Weganan CAC, Weganan Panamericano, Weganan Olimpico). Ademas e participacion aki no por ta mas cu 12 aña pasa.

Despues di a hasi un inventario, a resulta cu tin actualmente un total di 142 atleta cu por pone nan mes candidato pa un funcion den e comision.

Pa medio di un carta, cu a wordo manda a traves di e Federacionnan na cual e atletanan aki ta pertenece, ta invita tur e atletanan cu ta interesa pa pone nan mes candidato pa un funcion den e Comision di Atleta di COA.

Ultimo dia pa hasi esaki ta 5 September 2009. Si ta necesario, lo hasi un ronda di eleccion bou di e candidatonan, pa yega na e cantidad maximo di miembronan di e Comision. Manera a splica, Presidente di e Comision lo bira miembro di Directiva di COA. Ta spera di por ricibi un cantidad grandi di postulacion, mirando e gran importancia di e Comision di Atleta.

- Advertisement -

DUNA COMENTARIO

Please enter your comment!
Please enter your name here