Home Politica Cu despido masal di trahador for di Valero MEP a perde hopi...

Cu despido masal di trahador for di Valero MEP a perde hopi sosten

0
0
SHARE
- Advertisement -

Mike de MezaORANJESTAD (AAN) – Matutino DIARIO a entrevista Parlamentario di AVP señor Mike de Meza, na momento cu den fin di siman por a mire para pafo, na entrada di Refineria Valero.

Mike de Meza a duna di conoce cu informacion cu el a haya ta cu enberdad Valero ta cerando su portanan, cu a manda tur contratista cas, y cu atrobe Aruba ta bay pasa door di un “nine eleven” locual ta nifica cu dia 11 di September tur contratista di Valero lo ta pafo.

Kiermen cu tur e tata y mamanan contrata, trahando pa Valero lo mester bay cas y keda sin trabao y despues di esaki e siguiente etapa ta cu Valero ta manda tur su trahadornan directo cas.

Mike de Meza a comenta cu esaki ta un lastima pasobra AVP a alerta gobierno y sigur Prome Minister cu e tin cu sinta na mesa, y esaki ta for di tres pa cuatro aña pasa caba, pasobra e situacion di e refineria tabata birando tur dia mas y mas precario.

Cuatro aña pasa, e politico a subraya, ya caba Valero kier a yega na un areglo cu gobierno, y nan a pidi pa elimina e BBO, ya cu hopi hende ta kere cu e BBO tin nada di haci cu esaki, pero tin prueba riba papel, cu Valero a laga gobierno sa cu si ehecuta e ley aki pa nan, e lo nifica cu e refineria no tin un termino largo mas habri.

Mike de Meza a agrega cu e por corda ora cu Prome Minister a bin na television haci hopi wega y chercha riba tur sorto di disparate, y hopi hende cu ta sostene e mandatario tabata hari.

Pero awe cu e refineria ta bay ta cera, hopi mama y tata ta perde trabao, unda cu tuma directo y indirectamente mas cu 7 mil hende na Aruba cu ta depende di e existencia di e refineria ta keda desemplea, e ta puntra su mes ken ta bay hari ora e realidad ta bin dilanti.

“ Pueblo di Aruba tin cu bay cosecha loke e gobierno di sr. Nel Oduber a sembra. Esey ta un desastre economico. No Valero so, pero KLM y American Airlines a pasa den mesun cos mescos cu Carnival Cruse Line. Awor ta Valero! E mesun razonnan: capricho, ignorancia, incapacidad pa sinta na mesa y esaki ta e resultado caminda pueblo di Aruba ta mira con un di e partnernan estrategico di Aruba ta abandonando nos pais”, De Mey a bisa.

El a agrega cu esaki ta pasando den porta di eleccion y pa laga sr. Oduber awor bin television haci tur su wega y laga su sostenedornan hari atrobe, cu e desastre aki nos tras, unda cu e refineria ta cera su porta.

De Mey a remarca cu esaki ta un tristeza, algo serio y Partido AVP ta spera cu ansia pa dia 25 di September yega y na momento di gana eleccion nan lo bay cerca Gobernador puntre si e por saca e gobierno di MEP si por den un dia y no warda un ni dos luna, pasobra mas lihe nan bay y AVP por drenta gobierno, mas lihe nan por cuminza traha pa drecha locual partido MEP bao liderazgo di sr. Nel Oduber a laga pa pueblo di Aruba, y specificamente pa e pueblo di San Nicolas cu ya ta sufriendo pa ocho aña largo di e negligencia total cu tin den dicho distrito door di gobierno di MEP.

“Hopi hende ta desapunta, hopi hende a mira esaki ta bin, nan no por a kere, keto bay nan a pensa cu ta otro hende kier a cera e refineria, pero awe nan a constata cu e ceramento di e refineria aki tin un nomber y tin un fam: señor Nelson Oduber! Y hopi ta e trahadornan cu awe cu a sali caba for di e refineria, ta convenci cu awor mas cu nunca Aruba mester di un cambio. E ta e momento pa saca partido di MEP for di gobierno y hinca AVP den gobierno, pasobra e ta basta! Esaki ta trabao di un mal maneho, di un maneho deficiente, di un gobierno cu no ta capaz di sinta na mesa!” Mike de Meza a remarca.

Di e trahadornan cu a perde nan trabao varios a bisa cu nan tabata sostene MEP pero awor ta mira cu mester deshaci di e partido aki for di gobierno, e politico a reitera!

- Advertisement -

DUNA COMENTARIO

Please enter your comment!
Please enter your name here