Home Hudicial Estafador profesional a haya un chens atrobe

Estafador profesional a haya un chens atrobe

3
0
SHARE
- Advertisement -

ORANJESTAD (AAN): Rolando R.H a presenta dilanti di huez Diahuebs, debi na e hecho cu el a worde acusa di a estafa hende pa keda cu nan placa.El a haci esaki cu 4 diferente persona na 4 diferente occasion.

R.H a worde acusa cu riba 4 di December 2008 el a gaña un persona cu e lo por cambia 1750 Florin pa 1000 dollar.E acusado a bisa e persona cu e ta traha na Marriott y cu eynan e por cambia e placa.E persona a bay banco, saca e placa y a duna R.H esaki.

R. a bise cu e lo trece e dollarnan e siguiente dia, pero e no a aparece.E persona tabata tin mester di e placa pa e manda su casa bay opera na Curaçao.

Ora e homber a busca drechi na cas di R.H, ruman muher di R.H a bisa e homber cu e no mester a duna R. e placa.

Na December tambe el a gaña 3 persona cu ta traha den un Bar Restaurant cu e ta chef na Marriott y cu e hotel tabata bende mueble y cu e por haya mueble na un prijs barata.

Un muher a dune 250 Florin pa cumpra un cama, un otro muher a duna R.H 375 Florin pa e cumpra un airco y spiel, mientras cu un homber a dune 700 Florin pa e cumpra un frigidaire y un stoof pe.

El a bay cu nan placa y riba e dia cu el a palabra cu nan el a bin cerca nan y bisa nan cu e lo bin cu e articulonan dentro di algun dia, pero nunca mas nan wak e.

Pa loke ta e 1750 Florin, R.H a declara na polis cu di berdad el a gaña e homber, pero su intencion tabata pa bay casino cu e placa, gana placa y trece e 1000 dollar pa e homber.

Sinembargo el a perde tur e placa den casino.Den e otro casonan el a purba mescos, pero e no a gana placa y pesey e no por a duna nan nan placa back.R.H a bisa si cu e ta lamenta loke el a haci y cu e ta dispuesto pa paga e personanan nan placa back.

Huez a mustra riba e hecho cu na 2006 caba R.H a ricibi 9 luna di castigo di cual 3 condicional, pa mesun tipo di acto criminal.

Na 2008 tambe el a worde acusa di ladronicia.Huez a puntra e acusado di con e ta sigui haci mescos.

Ultimo biaha cu R.H a aparece den corte, el a haya oportunidad di busca placa pa paga e persona di cual el a horta e 1750 Florin.

Su detencion pues a worde suspendi riba 3 di April y el a bisa cu tabata tin un torneo grandi den cual e lo para umpire y asina e lo gana e placa pa paga e victima.

Huez a puntre cuanto el a paga e victima y el a bisa cu biaha pasa e no a logra haya e torneo grandi, pero cu el a duna su abogado 850 Florin caba pa paga e victima.

Huez a puntra e abogado di con e placa no a worde duna nan e persona perhudica y e abogado a splica cu door cu e placa no tabata completo ainda.

Fiscal a bisa cu biaha pasa a palabra pa R.H trece recibo pa O.M pa mustra cuanto el a gana y cuanto el a paga.

Fiscal a exigi un castigo di 9 luna di cual 3 ta condicional, cu e condicion cu R.H mester paga e victima 1750 Florin.

Abogado Nilo Croes representando R. a bisa huez cu su cliente kier paga e personanan perhudica nan placa, pero R. mes a bisa cu ta dificil pa haya un trabao, specialmente mirando su carchi di castigo.

R. a bisa huez cu si e bay cera back, e lo no por gana placa pa paga e victimanan back.El a splica cu e fin di siman cu ta bin e ta cuminza di ta umpire den un torneo, cu cual e por gana suficiente placa pa paga e victimanan.

E torneo ta bay dura varios siman y asina e por gana placa.Huez na final a dicidi di duna R.H un ultimo chens, pa asina e por paga e placa back na esnan cu el a perhudica.

Mirando cu R. a sinta 101 dia caba, huez a dune un castigo di 270 dia, di cual e 101 dianan cu el a sinta caba ta incondicional.

E resto die dianan mester keda colga riba su cabez den forma di un castigo condicional.E condicion pa esaki sin ta cu dentro di 1 luna e mester paga e prome victima su 1750 Florin back.Ademas di esaki e mester cumpli cu 120 ora di trabao pa comunidad.

Huez kier a pone tambe como condicion cu e mester caba di paga e otro victimanan nan placa dentro di 1 aña, pero R. a bisa huez cu dentro di dos luna e por paga nan.Huez e ora ey a pone cu R.H tin cu paga nan dentro di 2 luna.

- Advertisement -

DUNA COMENTARIO

Please enter your comment!
Please enter your name here