FAVI ta mustra su clientenan cu nan por ta creativo
ORANJESTAD (AAN): Manera nos a publica ayera, Quota Club ta sosteniendo ampliamente e labor cu FAVI ta realizando den nos comunidad.
FAVI ta un centro cu ta yuda esnan cu ta ciego of cu tin problema cu bista. Nan ta realiza diferente tipo di actividadnan pa asina e personanan aki por bay dilanti den bida atravez di training.
Diahuebs durante di actividad di FAVI-Do (obra di man y actividad social) y tambe e inicio di e accion di donacion 2009 a haci apertura di un espacio cual lo sirbi pa e clientenan traha cu palo. E clientenan ta traha por ehempel lijshi pa potret, garoshi, auto chiquito, cas pa pahra etc.
Señora Suzy Maduro, presidente di Quota International of Aruba a corta e cinta acompaña pa Sr. Raymond Kelly, kende ta boluntario cu ta coordina e carpinteria aki.
Despues Señora Suzy Maduro a devela e borchi cu nomber di Quota International of Aruba cu nan slogan “ We share”. Quota International of Aruba a financia e adaptacion di e espacio cual tabata hopi necesario pa haci bon uso di dje.
Den entrevista cu Señora Maduro el a manifesta cu loke FAVI ta haciendo ta tremendo. Pa varios aña caba, empleadonan di SETAR tambe ta contribui conhuntamente cu Quota Club.
A agrega cu den e funcion di SETAR e tabata na FAVI, pero tambe como Presidente di Quota Club ya cu e instancia aki ta contribui entre otro cu Fundacion Hende Muher den Dificultad, muchanan pero tambe cu esnan cu tin problema cu habla, oido y bista.
Segun Señora Maduro, pa varios aña nan ta duna donacion na FAVI y nan ta wak cu nan ta haciendo un tremendo trabao. Sin e hendenan cu ta den e directiva cu ta haciendo esfuerzonan, e hendenan di FAVI no lo tabata tin mucho cos di haci.
FAVI ta mustra su clientenan cu tin caminda di cana, cu nan por ta creativo y cu por produci hopi cos bunita tambe.
A señala cu e personanan cu ta bishita FAVI tabata tin hopi necesidad di e carpinteria y Quota a dicidi cu nan ta duna nan pasobra a ripara cu nan ta hopi organiza, nan ta productivo y nan ta bin cu un programacion hopi bunita pa e clientenan cu ta atende e centro aki.
A duna nan e placa cu tabata falta pa haci e soño aki realidad. “Mi ta hopi orguyoso cu normalmente nos no ta poni plachi na unda nos ta haci trabao, pero cu nan a honra nos di pone un plakaat di Quota na e lugar nobo, pa e miembronan di Quota e ta algo sumamente great”.
A enfatiza cu nan no ta hacie pa haya reconocimento, sino pasobra nan kier yuda esnan cu mester di dje.
