Home Politica Fundacion ta recorda fecha natal di Watty Vos

Fundacion ta recorda fecha natal di Watty Vos

27
0
SHARE
- Advertisement -

wattyvozORANJESTAD (AAN): Diadomingo ultimo a recorda cu 72 aña pasa, 16 di Augustus 1937, den un cas na Weststraat den e bario di Rancho a nace un persona cu durante cada etapa di su bida a sirbi su comunidad tanto como futbolista, musico, sindicalista y politico. Su mayornan a dune e nomber Edgar Joaquin Vos, pero ta bao di e nomber di carinjo “Watty” Aruba henter a conosele.

FUTBOLISTA: Watty a milita tanto den e equipo di Aruba Jrs. como tambe den e selecshonan di Antiyas Hulandes y Aruba. Periodo den cual e selecshon di Antiyas a gana na dos oportunidad medaya di plata den e weganan di Centro America y di Caribe, den ambos selecshon Watty a forma parti como defensa estelar.

Como futbolista di e equiponan aki Watty a hunga contra equiponan manera Saprissa di Costa Rica, Millionarios di Colombia, Arseñal di Inglaterra, y tambe contra mayoria, si no ta tur, seleccionan di islanan di Caribe. Durante e periodo aki no ta e equiponan di Aruba y Antiyas tabata tene cuenta cu e selecshonan di exterior pero ta nan tabata tene cuenta cu nos seleccionnan.

MUSICO: Den e añanan di cincuenta Watty hunto cu algun amigo a funda e agrupasion musical Los Duques del Caribe, cual orquesta durante e periodo aki a causa hopi furor den e mundo di farandula di Aruba. Na cuminsamento Watty tabata e cantante, pero despues a disidi cu ta mihor e bira e timbalero mirando cu cantamento no tabata algo pa su persona. Watty tabata fungi tambe como manager di e agrupasion aki .

Los Duques tabata e orquesta cu a toca durante e inaugurasion di e prome hotel turistico di Aruba, Aruba Caribbean Hotel. Cu otro palabra Los Duques ta e prome agrupasion musical cu a toca den e Dame Blanche, cual por cierto a caba di cumpli 50 aña. Tambe Los Duques ta e prome agrupasion musical aki na Aruba cu a toca pa un miembro di casa real, princesa Beatrix kende awe ta nos Reina. Tambe Los Duques tabata e prome agrupasion musical cu a inclui un ser femenino como cantante y esaki tabata den persona di Leda Vasquez.

SINDICALISTA: Den e periodo di decada di sesenta Watty tabata president di e sindicato ANAAB, awe SEPPA. Durante e periodo di Watty como sindicalista pa prome biaha den historia ambtenaarnan na Aruba a welga pa nan derecho. Como sindicalista nunca Watty a recuri na tacticanan di redo, difamacion of di envidia pa asina alza su mes riba otronan. Pero recuriendo semper na principionan di respet mutuo, dialogo y comprension.

POLITICO: Pa motibo cu Watty no tabata e sorto di politico cu ta warda campaña yega pa e ora numa ban bishita cas, ban entiero, ban para canto di caminda parti sticker, ban pone reunion di contacto na cas di hende, of forma parada di auto den pura. Watty dia aden, dia afo tabata keda den contacto personal cu su pueblo.

Awendia bo ta weita con diferente politico ta habri oficinanan politico rond di Aruba pa campaña. En cambio Watty tabata risibi hende na su cas, cual durante campaña tabata fungi tambe como su centro politico. Y durante campaña tur diahuebs anochi tabata tene reunion di contacto na su cas.

Watty tabata di fuerte pensamento cu e politico cu no ta capas di habri porta di su cas pa pueblo no ta un politico sincero. Pa motibo cu e politico aki lo no kier pa pueblo haya sa ta na unda e ta biba y kende nan ta su famia, pa asina ora e politico aki faya pueblo no por localise pa reclame. Un nomber cu Watty tabata tin pa e sorto di politiconan aki ta ”fly by night”, pasa pica den scuridad y desaparese ora claridad cuminsa drenta.

Desde 1971 te cu 1997 sea formando parti di MEP, RUBA y di AVP Watty den tur e elecshonnan di e periodo antes menciona a worde elegi semper cu votonan preferencial. Su manera di campaña tabata a base di sinceridad, integridad y compromiso. Watty semper tabata bisa “E compromiso di un politico ta di no priminti, pero di compromete su mes cu e electorado y di cumpli cu e compromiso haci”. Apesar di tur e funcionan importante cu Watty a ocupa como politico semper el a keda e mesun persona humilde di Rancho. Prueba di esaki ta su amigonan inumerabel di infancia cu a keda cunele te na final y cu ainda ta recordele.

E frase “Pa bo por ganami, bo mester lanta prome cumi y drumi despues dimi” ta refleha e pasion, determinasion, perseverancia y curashi cu Watty tabata tin pa sirbi su pueblo den cada etapa di su bida.

Desde 6 di januari 2001 cu Watty fisicamente no tey mas cu nos, su falta den e comunidad Arubano ta birando dia pa dia mas grandi, pero su ensejansa y experiensia cu el a laga atras ta pa no solamente keda papia riba djele pero tambe di haci bon uso di djele. Pa motibo cu Watty Vos semper a traha pabo!

- Advertisement -

DUNA COMENTARIO

Please enter your comment!
Please enter your name here