Home General Hopi chofer di autobus ta coriendo ruta di hotel sin cu nan...

Hopi chofer di autobus ta coriendo ruta di hotel sin cu nan mag

0
0
SHARE
- Advertisement -

ORANJESTAD (AAN) – Ayera DIARIO a ricibi un reaccion relaciona cu un comentario di un di nos coleganan tocante e tardanza pa haya autobus chikito den e trayecto San Nicolas-Playa unda e mes mester a warda 40 minuut prome cu por a subi bus, recientemente.

E reaccion a bin di un persona cu ta traha den transporte publico tambe y el a comenta cu esaki a bay completamente for di man e ultimo temponan aki unda cu D.O.P.V mes no ta actua contra e kibramento di regla cu tin cerca varios chofer cu tin vergunning pa core autobus, cu ta perhudica e pasahero riba e rutanan cu nan mag core.

Manera ta conoci cada chofer di autobus tin un ruta stipula pa e core, pa cual e tin vergunning. Locual ta pasa ta cu for di como siete aña pasa cu algun chofer di autobus di Noord a cuminza core e ruta di hotel locual tabata prohibi pa añanan, pero autoridad concerni no a stop nan, despues a para bira cu algun chofer di autobus di San Nicolas-Playa, a cuminza coi e ruta di hotel tambe.

Pesey e taxistanan a yega di protesta pasobra e chofernan di autobusnan aki ta trapa riba nan pia, ya cu nan ta bayendo un ruta cu ta destina pa taxinan y Arubus, y nan no ta respeta D.O.P.V, ley, ni nada.

D.O.P.V mes no sa mas kico pa haci cu nan, tin chofer cu a haya carta y multa pero keto bay nan ta sigui core e ruta y nan ta laga e pasaheronan di San Nicolas-Playa y viceversa na caya. Esey ta e motibo pa cual hopi biaha por mira cu tin demasiado hende ta warda bus di San Nicolas pariba di e kerki y den e paradanan cu tin banda di caminda, biniendo di San Nicolas pa Playa y tambe di Playa pa San Nicolas.

Tur cos a sosode pasobra tin un chofer cu D.O.P.V a hala su atencion pero no a para firme suficiente pa stop e, cu tur otro chofer a bisa cu si e por nan tambe por, perhudicando e pasaheronan cu ta cay den e ruta pa cual e chofernan aki a haya permiso.

E poco chofernan cu si ta cumpli cu ley ta esnan cu mester piki pasaheronan te unda nan por, y pesey nan ta yena asina lihe cu ta keda un cantidad di usuarionan cu nan no por duna servicio. Esaki siendo cu pa San Nicolas tin suficiente cantidad di autobusnan cu ningun hende mester a keda warda pa oranan largo den e parada di bus chikito ni e otronan cu tin banda di caminda den e ruta menciona.

Diferente chofer cu ta core e ruta di Noord tambe ta haciendo esey y pesey por mira hopi hende para na cant’i caminda di Ponton bay abao, y tin di nan cu tin biaha mester paga taxi pa nan por yega nan trabao of otro destino.

Cu otro palabra e bolo cu antes tabata pa parti entre Arubus y taxistanan, awor mester worde parti cu mas hende sin cu nan tin permiso pa core e ruta di hotel cu e intencion di subi mas tanto turista posible mientras cu hopi pasahero local no tin autobus pa nan.

DIARIO lo tuma contacto cu D.O.P.V tocante e situacion aki y di con autoridad concerni no por stop e desaroyo aki cu sigur, ta perhudicando un cantidad grandi di pasahero local.

- Advertisement -

DUNA COMENTARIO

Please enter your comment!
Please enter your name here