Home Deporte IDEFRE ta introduci su calendario Deportivo Escolar 2009 –2010

IDEFRE ta introduci su calendario Deportivo Escolar 2009 –2010

3
0
SHARE
- Advertisement -

idefreORANJESTAD(AAN)—Aña escolar nobo a cuminsa y tur studiante ya caba ta sinta den klas. IDEFRE a prepara y tin cla e calendario deportivo escolar pa aña 2009 – 2010. E competencia deportivo cu ta tuma lugar ta pa scolnan di enseñansa basico y pa scolnan di enseñansa avansa. IDEFRE ta organisa y coordina tur torneo escolar.

Deporte pa Scolnan Basico
Pa e aña escolar 2009 – 2010, team di mucha muhernan di scol basico ta participa na competencia di trefbal, volleybal, futbol, kickbal y softbal. Mientras cu e mucha hombernan ta participa den team na competencia di volleybal y futbol. Pa deporte individual por participa na atletismo, landamento, dam y ahedrez.

Pa prome biaha, IDEFRE ta bin cu deporte den team pa klasnan 1 y 2 di scol basico. Riba calendario deportivo escolar 2009 – 2010 ta aparece torneo di kickbal pa mucha muher y torneo di futbol pa mucha homber.

Deporte pa Scolnan Avansa
Pa scolnan avansa e disciplina di deporte den team pa mucha muher ta volleybal y softbal, mientras cu pa mucha homber ta futbol di sala, softbal y basketbal. Pa deporte individual cu ta habri pa ambos sexo, tin competencia den dam, ahedrez, atletismo y landamento.

Competencia Interinsular
Manera ta e caso tur aña, e scol basico y e scol avansa cu clasifica durante nan competencia na Deporte Escolar e aña aki ta haya e oportunidad pa representa Aruba na e competencia interinsular di entre otro softbal, volleybal, futbol di sala, futbol, como tambe landamento y atletismo. E competencianan aki ta tuma lugar na Corsow di dia 12 pa 14 di maart 2010, na Boneiro di dia 26 pa 28 di maart 2010 y na Aruba di dia 16 pa 18 april 2010. Cada scol cu clasifica ta haya tur informacion na e debido momento.

Clasificacion pa Olimpiada Escolar
E scolnan di enseñansa basico y enseñansa avansa cu clasifica durante e competencia di Deporte Escolar 2009 – 2010 ta participa na Olimpiada Escolar 2010. Olimpiada ta tuma lugar for di dia 28 di mei 2010 te cu dia 12 di juni 2010 aki na Aruba mes. Esaki no ta conta pa e deporte di futbol di sala.

Pa cada scol ta un honor sigur pa clasifica y tin e oportunidad pa representa nan scol durante e competencianan Interinsular como tambe e Olimpiada Escolar. Cu esaki den mente, e scolnan ta prepara nan alumno pa participa na e competencia di e diferente disciplina di deporte cu IDEFRE tin riba e calendario deportivo escolar.

Deporte pa Scolnan Preparatorio
Pa prome biaha, IDEFRE tin riba e calendario deportivo escolar e deporte di atletismo pa scolnan preparatorio. Esaki ta tuma lugar na luna di januari 2010. Den luna di oktober tur scol preparatorio ta ricibi e informacion necesario relaciona cu e competencia di atletismo.

Na inicio di e temporada escolar nobo, tur scol a ricibi caba e calendario deportivo escolar di aña 2009 – 2010. Mayornan cu tin nan yiu activo den un of otro deporte, por haya tur informacion na scol of por tuma contacto cu oficina di IDEFRE na telefon

582 4987 pa keda altanto di e fecha cu e competencia deportivo ta tuma lugar. Mientras cu IDEFRE atrabes di tur medio di comunicacion ta keda informa y recorda e scolnan riba nan inscripcion pa participa na e diferente disciplina di deporte cu tin riba e calendario deportivo escolar.

IDEFRE ta desea na tur hoben exito den nan estudio. Y cu e aña escolar 2009 –2010 ta uno activo y productivo pa logra boso meta tambe riba e tereno di deporte.

- Advertisement -

DUNA COMENTARIO

Please enter your comment!
Please enter your name here