Home General Innecesariamente a bati alarma grandi na Aruba

Innecesariamente a bati alarma grandi na Aruba

1
0
SHARE
- Advertisement -

aeropuerto ORANJESTAD (AAN): Un mensahe di “mayday” a worde scucha Diamars mainta algo prome cu 10’or di mainta riba e frequencia di emergencia di VHF-Air. Esaki na su turno a crea un efecto di domino, cu a pone vehiculonan di emergencia cu sirena mobiliza di tur parti di Aruba rumbo pa Aeropuerto, debi cu un hende a dicidi na bati “Groot Alarm”.

“Groot Alarm”, sin cu ningun hende sa kico ta pasando. Prensa tambe a cuminza haya detaye, cu un avion di American Airlines bulando den e region, lo a bati alarma. Pero despues di esey… no por a scucha nada mas! E frequencia a keda keto, y no por a tende nada mas.

A resulta cu e yamada di emergencia aki, tabata destina pa Aeropuerto di Kingston, Jamaica, cu ta keda 950 kilometer mas leu di Aeropuerto di Aruba. Despues cu a manda e “Mayday” riba frecuencia di emergencia, aparentemente e pilotonan a switch over pa frecuencia di Jamaica pa sigui comunica. Pesey e canal di emergencia a keda “keto” despues.

A resulta cu un Airbus A320 di AirJamaica a lanta vuelo pa 9’or di mainta rumbo pa New York. Pasando e momento ey ya caba riba Cuba, diripiente e windshield di cockpit a kraak, y esaki a pone pilotonan declara un emergencia mesora.

Envez di ateriza na Cuba, nan a opta pa dal un vuelta y regresa na Kingston. Asina algun rato despues nan a ateriza na Normal Manley International Airport na Jamaica. Vehiculonan di Rescate tabata na un standby na Jamaica pa esaki.

Pero sin cu Jamaica sa… na Aruba tambe tabatin Bomberonan para cu truck cendi, zwaailicht cendi, y pompnan cla tambe cla… wardando e avion baha na Aruba… y nunca el a yega!

Pues henter un mobilizacion na aeropuerto, y despues di algun rato, a bin resulta cu enberdad tabata tin un “mayday” pidi pa un avion pero cu esaki no tabata pa aeropuerto di Aruba sino pa aeropuerto di Kingston, Jamaica caminda cu e avion Air Jamaica vuelo 015 tabata regresando.

Kende a comete e barbaridad aki? Toren di Control di Aruba? Of un supuesto yamada di Miami?

Esaki sigur a causa un consternacion na aeropuerto ya cu tur instancia tabata cla prepara caba tanto ambulans, brandweer, polis y por a compronde hasta Rode Kruis pa despues bin resulta cu e alarma bati no tabata pa Aruba.

Instancianan a sinta despues hunto pa averigua unda e confusion aki a bini y pa esaki no pasa mas. Na Jamaica mientras tanto, e avion a ateriza sin problema, y ningun hende a resulta herida.

Kraak den windshield di avion no ta algo inusual. Windshield di un avion ta diseña pa wanta presion di aire na 400 nudo, y hasta por sobrevivi si un parha dal contra dje. Kizas un di e motibonan cu e windshield a kraak ta cu e sistema interno di cayente (cu ta evita cu e windshield vries), ta worde mal instala. E vuelo pa New York a sigui te ayeranochi 8:30’or.

- Advertisement -

DUNA COMENTARIO

Please enter your comment!
Please enter your name here