Home General Kiwanis Club of Aruba cu tremendo “Alaskan Wine & Cheese Party” 26...

Kiwanis Club of Aruba cu tremendo “Alaskan Wine & Cheese Party” 26 di September proximo

1
0
SHARE
- Advertisement -
Sr.  Giantonio Muller y Sr. Bob Spellen a bishita DIARIO
Sr. Giantonio Muller y Sr. Bob Spellen a bishita DIARIO

Fondonan recauda lo bay pa muchanan den necesidad di nos comunidad! 

ORANJESTAD (AAN): Tur aña, Kiwanis Club of Aruba ta realiza diferente evento special pa recauda fondo pa gruponan den necesidad di nos comunidad.

  Un di e eventonan aki ta e asina yama “Alaskan Wine & Cheese Party”, cual ta ser teni e aña aki pa recauda fondonan ta muchanan den necesidad di nos comunidad.
  DIARIO a combersa riba e actividad aki cu e organizador y alavez Lt. Governor of Division 26 Sr. Robert “Bob” Spellen y Sr. Giantonio Muller, miembro di Kiwanis Club of Aruba kendenan a papia riba e tremendo actividad aki cu lo worde teni diasabra 26 di September na Renaissance Convention Center.


  Sr. Bob Spellen a splica cu ta custumber cu Kiwanis of Aruba, cu ta bay celebra 45 aña di existencia na Februari otro aña, cu pa mas di 30 aña ta organizando tipo di eventonan aki, particularmente e “Wine & Cheese Party” cu tabata un evento diferente.
  A señala cu den e ultimo 10 añanan, el a transforma den un “Wine & Cheese Party” na unda nan ta hacie particularmente pa recauda fondo pa yuda primeramente e muchanan di nos comunidad cu ta den necesidad.
Sr. Spellen a manifesta cu esaki ta e meta mas grandi y principal di e evento aki cu nan ta organiza anualmente.
E ta algo cu e ultimo añanan a logra masha acogida y for di esey nan ta yuda masha hopi instancia aki na Aruba. E ta un actividad cu seguramente mester di apoyo di tur hende den e comunidad di Aruba, particularmente cu ta contribui na e causa aki, a agrega.
   Kiwanis Club Of Aruba ta duna un danki special na tur e distribuidornan di biña na Aruba cu ta colabora masha hopi pa e actividad aki por bira posible.
Banda di esaki, Giantonio Muller a indica cu e asina yama “Alaskan Wine & Cheese Party” ta bay tuma lugar Diasabra 26 di September 2009, e dia despues di eleccion.
   E lo tuma lugar na Renaissance Convention Center cuminza 8’or di anochi te 2’or di madruga. E musica lo ta na encargo di dos top banda na Aruba, esta Robert Jeandor & Solo Banda Show y Tsunami.
   E contribucion pa e fiesta ta bay ta un suma pa pareha y e suma aki ta inclui entrada, tur e biñanan y keshi pa e anochi. Tambe ta inclui un plato di cuminda, a señala.
   Segun Sr. Muller, e ticke tnan ta obtenible cerca e miembronan di Kiwanis of por yama tambe Sr. Spellen na 733-0092 of Sr. Muller na 593-3414.
   Algo hopi importante y cu sigur tur hende lo tin hopi expectativa riba dje ta e premionan grandioso cu lo worde rifa e anochi aki.

 DOOR PRIZES FABULOSO:

  Sr. Spellen a manifesta cu e idea ta pa semper purba pa duna tur hende un tiki back y nan a haya contribucion y ayudo door di hopi instancia na Aruba, particularmente hotel, restaurant y diferente tipo di negoshi cu ta sa duna nan weekend stays, dinner for two, massages, y diferente premio cu nan ta rifa durante e anochi aki.
  E premio mayor, segun Sr. Muller ta bay ta tickets aereo pa dos persona pa bay Alaska incluyendo un crusero di un siman. E crusero aki ta “all inclusive”, pero fuera di e ticketnan cu e ganador lo haya y e crusero, e lo haya tambe un “zakheld” di 1000 dollar.

 FONDONAN RECAUDA
    E destino di e fondonan recauda, Bob Spellen a declara, lo ta pa purba yuda mas tanto instancia cu ta posible. Entre otro nan sa yuda Imelda Hof, Casa Cuna, Ban Uni Man pa Cria Nos Muchanan, YMCA. Tur e instancianan concerni cu ta traha cu mucha.
   Banda di esaki tambe tin cierto situacionnan cu ta yega un dado momento y cu ta urgente cu por ta casonan individual, a agrega.
  Despues di esey nan ta yuda tambe e hendenan di edad cu ta semper ta forma parti di e gruponan den prioridad.
   Un biaha pa aña, a sigui bisa, nan ta organiza un evento special pa nos grandinan cu ta den fin di aña, pa Pasco, na unda Kiwanis Club of Aruba ta duna nan tambe fuera di un comemento na un restaurant ta regala nan tambe un basket cu nan por pasa nan fin di aña y aña nobo cune.
  Bob Spellen a subraya cu Kiwanis Club of Aruba no tin un suma di placa specifico cu nan kier recauda. Loke sea cu nan por recauda nan ta contento cu esey.
  Nan average di tur aña ta core den 100 mil florin y nan meta semper ta pa cada aña aumenta un tiki mas.
   E ultimo aña, a bisa, mester tene na cuenta cu e situacion economico no ta na nan fabor, pero tog nan ta hopi agradecido cu tur esnan cu ta yuda, ya sea atravez di compania of individualmente. Cu lo a ser recauda den pasado, nan a logra duna esunnan bek den nos comunidad pa yuda nan cune.
  A enfatiza cu e meta ta pa aumenta e suma recauda tur aña pero mester tene cuenta cu e situacion con e ta bayendo awendia.

 DRESS CODE:
   Manera e nomber mes ta sugeri, e tema di e “wine & cheese party” di Kiwanis Club of Aruba e aña aki ta relaciona cu frieu. Alaska ta un lugar masha frieu mes y sigur e ganador di e premio mayor di evento lo mester bay prepara pronto su paña pa soporta frieu durante su crusero na Alaska.
   Segun Bob Spellen y Giantonio Muller, e dress code pa e anochi aki ta Alaskan Formal/Captains Dinner.

INVITACION SPECIAL:

  E invitacion ta pa yuda Kiwanis Club of Aruba pa asina bende mas carchi pa e ora ey por recauda mas fondo. “Nos ta asegura nan cu ora nan bin e fiesta nan ta really enjoy un evento cu ta diferente. Hendenan cu ta biniendo e ultimo añanan ta disfruta masha hopi pasobra e ta un anochi realmente relahante . E ta hopi sociable. Comunidad tey y ta algo cu ta vale la pena tog cu bo ta wak cu whatever cu bo hincando den dje bo ta wak e resultado positivo foi dje tambe”, Sr. Spellen a declara.
   Ta bon pa reitera cu e ticketnan ta obtenible cerca e miembronan di Kiwanis Club of Aruba of por yamando tambe Sr. Spellen na 733-0092 of Sr. Muller na 593-3414.
  Mas informacion lo wordo publica tambe den e dianan aki den DIARIO.

 

 
- Advertisement -

DUNA COMENTARIO

Please enter your comment!
Please enter your name here