ORANJESTAD (AAN): “For di tempo di ATIA mi a bisa cu e forma con e proceso di otorgamento di e proyecto aki ta bayendo ta robez y keto bay mi tin e mesun opinion”, asina Juan David Yrausquin a bisa ayeramainta durante un conferencia di Prensa di Partido AVP.
E candidato number 29 riba e lista berde a splica cu e ta den posicion di documentonan cu ta prueba cu Gobierno di antemano caba a scohe cua grupo lo haya e proyecto aki, pues henter e asunto di destaho publico no ta cuadra.
“Riba dje mi kier bisa cu mi no tin mucho confianza den e destaho publico di e Gobierno aki tampoco. Nan kier pa e Minister nombra un comision cu lo dicidi kende lo haya e proyecto na final. Kiermen mas politico e decision no por ta”, segun Juan David Yrausquin.
E mesun practica aki a haci caba den pasado den e proyecto di dump. Aki a haci un destaho publico pero na final ta e Minister a dicidi kende a haya e proyecto. Coincidencia of no, pero esun cu a gana e destaho publico aki tabata e persona unda a traha e ultimo lista pa bay eleccion di Partido MEP.
E proyecto a resulta dobel di e otro participantenan den e bid y awor cu e proyecto ta cla, Gobierno mester paga 1 miyon Florin pa luna na coriente y gasolin pa por maneha e aparatonan. E tipo di informacionnan aki no a duna ora cu a otorga e proyecto na un bon conoci di e mandatario.
Juan David Yrausquin a bisa for di momento cu el a anuncia su mes riba lista di Partido AVP cu e ta para tur loke ta inhusticia. Ta pesey su lema di campaña ta “Curashi”, loke precisamente e politiconan di MEP no tabatin pa por a para tur e proyectonan aki cu awor lo costa pueblo miyones innecesariamente.
E hoben politico a duna di conoce cu na mas cu un ocasion a purba pa por yega na un debate cu Minister Eddie Briesen riba e proyecto aki pero e no kier, y ta core constantemente pa duna cara pa e proyecto dudoso aki di mudamento di waf.
Juan David Yrausquin ta reta Minister Briesen pa laga e gruponan Spaño pone den un carta cu no tin ningun compromiso haci cu Gobierno di Aruba riba e asunto aki. E ta convenci cu e peticion aki ta uno masha dificil pa e mandatario cumpli cune pasobra e documentonan cu Juan David Yrausquin y AVP ta dispone di dje ta menciona e relacion entre e gruponan Spaño y e diferente proyectonan. Pues, e maneho di real estate riba nos waf ta bay na e Grupo Trusam, maneho di crucero ta bay pa Cruceros de Barcelona y e maneho di container ta bay na Terminal de Contenedores de Barcelona.
