Home Politica Marlon Werleman a haye ta bandona lista di MEP

Marlon Werleman a haye ta bandona lista di MEP

5
0
SHARE
- Advertisement -

nomberlista

ORANJESTAD (AAN) – Manera ta conoci ayera anochi e Parlamentario di MEP, Marlon Werleman, a convoca un conferencia di prensa den su sede di campaña na Paradera, den cual el a anuncia oficialmente na nos comunidad, cu e no ta bay participa mas den e proximo eleccion, dia 25 di September.

For di oranan di mainta tabata circula e “rumor” cu sr. Werleman a tuma e decision aki debi cu el a worde poni number

11 riba lista, mientras cu e tabata spera un mehor posicion mirando cu e ta cumpliendo 20 aña den politica y como militante di MEP.

No obstante, el a nenga cu disgusto ta e motibo. El a bisa mas bien cu ta trata di un decision cu el a tuma for di November aña pasa, pero ta contradictorio anto cu e ta hibando campaña te ainda.

Marlon Werleman a cuminza bisando cu aña pasa el a cumpli binti aña den politico y riba lista di MEP y cu esaki a pone cu na dado momento el a considera pa retira di su carera politico y asina el a notifica su lider di partido Nel Oduber.

Werleman a uza como argumento cu e tin su propio negoshi cual el a neglisha pa ocho aña largo, pero awor e kier dune prioridad y dedica su mes na su famia.

El a comenta cu su lider di partido a bise cu berdaderamente 20 aña ta un temporada largo y cu e mes no ta compronde con el a keda 35 aña caba den politica sin cu a retira ainda.

Werleman a bisa cu riba su peticion na November aña pasa e lider di Partido a pidie pa e considera tog y pensa pa bay den e siguiente eleccion y e proceso aki a cuminza algun luna pasa y e tambe a inicia haci preparacion, despues di a eherce un trabao, e ta kere cu na satisfaccion di hopi di su colega Parlamentario.

Tog, el a cuminza forma su comision di campaña cu hunto cune a haci e preparacion di campaña y a habri su oficina unda ayera anochi e miembronan di prensa a bay scucha Werleman anuncia su retiro como candidato riba lista di MEP y como politico.

El a papia di e rifa di un auto pa medio di cual nan ta recaudando fondo pa e campaña, riba cual su comision a traha duro, cual no ta bay stop pasobra e lo sigui y e producto di esaki lo bira un donacion pa e Misa di Paradera pa su necesidadnan.

Tocante e asunto di number, Werleman no a admiti directamente cu esey ta e motibo di su retiro. El a splica cu e lider di Partido a bise cu nan ta bay wak con ta bay ubica e Parlamentarionan riba lista, y mas cerca nan a yega di e dianan culminante el a tuma nota cu sr. Oduber a scoge e momentonan aki pa rehuvenece e partido y asina el a busca y haya gran cantidad di ciudadano cu a mustra nan disponibilidad pa subi un lista ganador y prometedor, segun Werleman.

Pa tal motibo e ultimo dianan den deliberacion cu e lider di MEP, y mirando ken ta e candidatonan cu a bin aden, Marlon Werleman a considera su posicion y a participa su comision di campaña ayera, cu ta necesario pa duna e sr. Oduber e espacio pa haci tal.

“Marlon ta importante pa su famia” e Parlamentario a expresa y a reitera cu e ta bay pa su retonan como negociante pa traha pe mes back y ta mas cu su famia.

Te casi na final, ora prensa a haya chens di haci pregunta, ta cu señor Werleman a menciona cu su comision di campaña a pidie pa transmiti su deseo na e partido, pa reconoce Werleman su binti añanan den politica y cu MEP, y di un manera of otro e number 10 a cay. Pero den deliberacion cu lider di MEP, esaki a bise cu e number 10 ta comprometi caba, no obstante e tin otro number pe den su pensamento.

For di e momento ey, Werleman a expresa, ya no tabata un punto pa trata pero un mensahe cu el a duna e lider di MEP, cu ta mehor e retira y dune espacio pa e rehuvenece su partido. El a declara cu despues el a worde ofrece otro number, pero el a tuma su decision caba. Marlon Werleman a nenga rotundamente cu el a worde acerca pa subi lista di otro partidonan y el a bisa cu e lo keda apoya MEP keto bay.

- Advertisement -

DUNA COMENTARIO

Please enter your comment!
Please enter your name here