Home Politica Mas edificio ta worde gehuur riba custia di pueblo

Mas edificio ta worde gehuur riba custia di pueblo

21
0
SHARE
- Advertisement -

abusosiguiORANJESTAD (AAN): Ta parce cu e gobierno abusador aki di NEL y MEP no tin basta. Atrobe ta huur edificio di mas cu 360.000 Florin for di financiadornan di partido MEP, mientras cu pueblo mester paga pa esaki mediante BBO.

Segun informacion cu DIARIO a ricibi, lider di partido MEP y actual ministro presidente di nos pais, sr. Nelson Oduber recientemente a bolbe firma un contrato di huur cu Boogaard Assurantiёn di sr. Miro Dabian. Manera ta conoci, ya pa basta aña caba sr. Dabian ta consehero principal y tambe amigo personal di lider di MEP.

A base di e contrato aki gobierno lo huur un edificio pa ubica e departamento Directie Telecommunicatie Zaken (DTZ) aden. Remarcabel ta cu aunke e edificio no ta ni cla ainda, osea apenas a yega su “spantenbier” siman pasa, e contrato ta firma caba cu intencion pa efectua e mudamento di DTZ pa e edificio nobo te despues di eleccion di 25 di september venidero.

Ademas, mester menciona cu actualmente DTZ ta usando 500 meter cuadra di espacio di oficina, cu ta suficiente grandi mirando cu DTZ ta un departamento relativamente chikito. Pues mientras cu berdaderamente no tin necesidad pa amplia espacio di oficina pa e departamento aki, e contrato di huur cu sr. Dabian ta pa huur un espacio di alrededor di 1.000 meter cuadra, esta dobbel mas hopi espacio cu loke DTZ tin mester.

A base di e contrato, e prijs di huur ta Afl. 30,= pa meter cuadra pa luna. Esaki ta nifica cu gobierno lo mester paga Afl. 30 mil pa luna cu ta Afl. 360 mil pa aña. E contrato tin un duracion di 5 aña, locual ta nifica cu en total e contrato lo costa gobierno (lesa: pueblo di Aruba) e balente suma di Afl. 1,8 miyon.

Mirando cu e contrato ta sobrepasa e suma di Afl 100 mil, nos ley di contabilidad ta prescribi un “openbare aanbesteding”. Hecho ta cu esaki no a tuma lugar. A base di nos ley di contabilidad gobierno por dicidi pa no haci un openbare aanbesteding, pero den tal caso mester tin motibonan valido y di urgencia pa hustifica esaki. Y mirando cu e motibonan aki no ta existi, henter e proceso pa cu ceramento di e contrato cu sr. Dabian ta contra ley.

Den apenas algun aña e gobierno di MEP a triplifica e suma cu gobierno ta paga na huur di edificio di Afl. 8 miyon pa Afl. 24 miyon pa aña, pa asina privilegia friends & family. Siendo cu na mesun momento tin un gran cantidad di edificio di gobierno para bashi cu a bira ruina y/of choller house, manera por ehempel e edificionan di Bushiri, Belastingkantoor, DOW, Voogdijraad, Bestuurskantoor y J.F. Kennedy School. Mayoria di e edificionan aki ta situa na lugarnan central y den bista di nos turistanan. Fuera cu dicho edificionan ta ehempel di destruccion di capital y tin un impacto sumamente negativo riba e calidad di nos producto turistico, nan ta demostra y confirma e decadencia y degeneracion di MEP su gobernacion.

Pa loke ta trata e contrato di huur cu sr. Dabian nos ta wak con sr. Nel Oduber atrobe concientemente ta actua en pugna cu nos ley di contabilidad y ta perhudica nos pueblo djis pa privilegia un bon amigo di dje. Interes di friends & family un biaha mas ta mas importante cu interes general di nos pais.

Obviamente lider di MEP ta sinti cu si su colega di partido sr. Rudy Croes por privilegia su famia cu miyones na huurmento di edificio na gobierno, e tambe por privilegia su bon amigo sr. Miro Dabian di e mesun forma aki pa e suma di Afl. 1,8 miyon. Specialmente despues cu algun siman pasa sobrina di sr. Rudy Croes, esta Evelyn Wever-Croes, cu ta representa e generacion nobo den MEP, a purba defende y hustifica e maneho di MEP pa privilegia famia Croes.

E ta increibel pero berdad. Den porta di eleccion sr. Nelson Oduber tin e tribilidad pa haci un acto asina condenable y repudiable. Definitivamente sr. Oduber y su partido ta “out of touch” cu realidad y no sa mas kico por y kico no por den un pais civilisa manera Aruba. E ta un falta di respet total pa henter electorado y ta recorda henter nos comunidad pakico un cambio den gobernacion y di gobierno ta asina urgente y necesario na e momentonan aki. Ta bisto cu pa sr. Nelson Oduber tambe e derota humiyante pa su partido ta inevitable y cu na ultimo momento e kier purba acomoda su miho amigo y financiador di campaña. Y pesey mes pueblo ta puntra: ta cuanto di e Afl. 1,8 miyon lo bay back den e campaña electoral di sr. Nelson Oduber y partido MEP?

- Advertisement -

DUNA COMENTARIO

Please enter your comment!
Please enter your name here