ORANJESTAD(AAN)— San Nicolas ta un di e distritonan, sino esun di mas lubida durante e 8 añanan di gobernacion di MEP, siendo cu esaki ta e distrito cu mas proyecto a wordo priminti den e dos campañanan di e partido cu awendia ta den gobierno, mustrando asina cu e promesanan haci a keda den bashi.
Otmar Oduber, parlamentario di partido AVP ta recorda con na 2001 Sr. Nelson Orlando Oduber, despues di a huramenta cerca Gobernador a saca un papel for di su saco y a bisa cu awor si e ta bay yama su gran amigo Bill Marriott pa bin cu un Ritz Carlton na San Nicolas, “wel señores, e hotel ey a keiro tur caminda na Aruba y a bay hoga na Malmok”, te dia di awe no tin ni sombra di un Ritz Carlton y mucho menos na San Nicolas.
Despues di esaki a bin cu e noticia cu lo traha tres hotel y dos golf course na San Nicolas, e biaha aki a pone un promer piedra, pero e piedra mientras tanto a bira santo caba, y ni holo di e proyectonan aki.
Awor di ripiente, mirando cu eleccion ta den porta atrobe, por scucha e integrantenan di MEP papia riba supuesto boutique hotels pa San Nicolas, y straño no lo ta cu un biaha mas ta trata di promesanan bashi, promesanan di eleccion caminda tur integrante di e partido geel ta sigui e pasonan di nan lider maximo bisando algo den campaña y haciendo algo otro den gobernacion pasobra campaña ta un cos y goberna ta otro.
Mientras cu a priminti y keda sin cumpli cu un cantidad di proyectonan pa e parti pariba di nos isla, un comerciante local a wordo nenga di desaroya un centro comercial y cinemas na San Nicolas, un proyecto cu sigur lo a duna San Nicolas un otro cara, pero segun ta parse a wordo nenga puramente pa represalianan politico, segun Otmar Oduber ta indica.
Mescos por bisa di e proyecto di Theme Park y Sea Aquarium cu e grupo Nanki kier a desaroya y cu tambe a wordo nenga pa gobierno di MEP.
Ohala por a bisa cu ta riba e aspectonan aki solamente San Nicolas y vecindario a wordo perhudica dor di Gabinete Oduber, pero no…Den enseñansa, caminda cu a laga Colegio Arubano bay atras considerablemente caminda cu awor un par di luna promer cu eleccion a dicidi di core bay dreche; Biblioteca Nacional cu a keda cera un temporada largo pa motibo di negligencia di e minister; e careteranan ta un desaster y lo maximo cu por a wak ta dos caya cu a wordo gelapi mientras cu a kita asfalt di otro cayanan y laga nan pa lunanan sin asfalt; edificionan di gobierno ta casi cay den otro; servicionan di gobierno a wordo manda Playa; parkenan deportivo laga atras dor di Gabinete Eman a wordo bandona; Joe Laveist ta casi cay den otro, etc, etc…
Otmar Oduber ta indica cu ta tristo pa mira con un gobierno cu ta conta cu dos minister di Pariba di brug y tambe varios miembro di Parlamento por a laga e distrito cu un tempo tabata esun cu a sostene nos economia, bay asina atras, lagando e totalmente lubida y sin haya atencion.
E parlamentario di AVP ta mustra cu contrario na MEP, e partido berde a sa di duna San Nicolas e atencion debido y esaki lo sigui ta e compromiso di partido AVP caminda cu den Plan Aruba Ariba tin stipula claramente con lo duna e parti pariba di nos isla e atencion debido, e atencion cu e merece! Ta trata aki di plannan concreto, plannan cu lo wordo realiza despues di 25 di september na momento cu pueblo duna partido AVP e sosten pa laga felicidad y posperidad reina atrobe na cada skina di nos isla. Tribi, e cambio t’ey!
