Home Politica Mester controla e calidad di nos pais pa medio di un entidad...

Mester controla e calidad di nos pais pa medio di un entidad regulator

1
0
SHARE
- Advertisement -

mpaORANJESTAD (AAN): Durante di e conferencia semanal di MPA e lider di e partido ros, mr. Monica Kock, a trece dilanti cu mester mehora e producto Aruba pa por fortalece nos turismo. Un di e puntonan cu MPA a trece dilanti con pa mehora e producto tabata pa bin cu un entidad regulador, un Tourism Task Force.

E Entidad di control aki ta necesario pa controla e producto Aruba. Si no tin control di e calidad di nos producto, naturalmente e calidad ta baha pasobra no tin consequencia si no ta cumpli cu un nivel halto. Control lo ta riba diferente tereno.

E organo lo mester consisti di AHATA, ATA y otro sector economico y di nos sociedad pa asina tin un base amplia na unda tur ta inter actua cu otro. Hunto nan por yega na un strategia comun pa turismo en bes locual nos ta mira cu cada un ta traha riba su mes. E logronan lo ta mas grandi.

1) E Task Force lo mester bin cu un plan di proteccion y mantencion di nos recursonan natural, particularmente nos atraccionnan turistico. Lo mester proteha, mantene y controla e sitionan. Nos mester sina nos les di e caida di Natural Bridge. Un recurso natural cu pa hopi ana tabata e cara di nos pais pa e turista. Aunke tabata sa cu e brug a delibita, no a tuma accion pa preveni y scapa e brug.

E la cay kibra y awe tur hende a lubida. Si despues nos no tin recursonan natural, no lo tin nada special pa e turista bin Aruba. Pero tambe pa e futuro generacion nos tin cu proteha nos recursonan natural. E Task Force por identifica y desaroya e otro puntonan cu potencial pa atraccion turistico p.e. Seroe Cristal y mina di fosfaat.

2) E Task Force lo mester planea y establece e mecanismonan pa implementa y controla norma y ley turistico, cu autoridad cu por cuid’e (p.e. Polis di Turismo). Esaki lo fortalece e union di sector priva y esun publico den un intento pa establece e obhetivonan na mediano y largo plaso pa turismo.

Un departamento di Control lo implementa un control di calidad continuo y consecuente, no solamente pa e hotelnan sino tambe pa transportacion publico y e otro sectornan cu tin di haci cu turismo. E control aki mester resulta den stimula e empresanan, scolnan, etc. pa educa y garantisa e producto di calidad y conserva nos medio ambiente.

E meta aki ta importante pasobra asina ta ta garantisa e nivel di calidad di e producti Aruba, cu ta ensera nos hotel, nos restaurant, nos taxi, nos trahadornan den tienda. Dor di bin cu un structura y condicionan lo asina determina e calidad di e compania y producto Aruba.

MPA ta di opinion cu e producto Aruba pa hopi ana caba a wordo laga un banda. E calidad di bo pais lo determina e calidad di e turista. Mas halto e calidad di tursita, mas halto nos entrada lo ta. Ta tempo cu ta tuma e responsabilidad di e pais como producto na serio y pone un organo encarga cu esaki. Asina lo tin claridad, guia y nos tur sa kico nos tin cu haci pa mehora nos pais.

- Advertisement -

DUNA COMENTARIO

Please enter your comment!
Please enter your name here