Nos pueblo ta inteligente y no ta bay cay pa politica di atake
ORANJESTAD (AAN) – Vicario Episcopal Pader Daniel Szpila, den entrevista cu nos redaccion, a duna comentario y alavez a manda un mensahe pa comunidad den nomber di Clero Catolico, pa durante e periodo di pre-eleccion y dia di eleccion, riba dia 25 di September proximo, tur cos bay bon.
“ Nos ta dunando un poco di atencion na e temporada aki di eleccion, pa medio di e Corant Catolico cu ta E Caminda. Siman pasa y e siman aki tambe Diadomingo venidero ora e corant ta sali lo tin un espacio den dje, dedica na esaki.
“ Nos ta invita nos parokianonan y henter e pueblo di Aruba pa haci uso di nos corant Catolico y pa por lesa nos mensahenan cu tin e intencion tambe pa prepara pueblo pa eleccion.
“ E mensahe naturalmente ta pa respeta otro, pa nos haci un campaña basa riba un proyecto y un proposicion pa pueblo di algo cu por ofrece na pueblo como solucion pa su bida, pa su desaroyo, tumando na cuenta locual ta e problema berdadero di e pueblo.
“ Esaki mester bira e base di campaña, no un atake personal, no un degradacion di otro, no mordemento di otro manera bestianan, no na un forma salvahe.
“ Si no ta bisa pueblo –mira, esaki ta e solucion cu nos ta mira, di tal manera nos kier atende cu boso necesidadnan, di tal forma nos kier yuda nos pueblo di Aruba, cu e medionan aki nos kier organiza boso futuro, etc., y laga hende e ora ey scoge e manera cu nan ta haya ta mehor pa nan futuro, pa nan desaroyo, pa nan bienestar di e partido cu ta haci e mehor oferta-.
“ Mi ta kere cu e pueblo no ta un pueblo kens ni bobo, pero un pueblo inteligente cu no ta bay cay den un wega violento, tin biaha sushi, unda politiconan envez di ofrece algo na pueblo nan ta degrada y ataca otro; y esaki ta e unico propuesta cu nan tin, nan atakenan, mordemento, sacamento di diente ban bisa.
“ Pero e politico asina sin duda lo perde pasobra e pueblo no ta un pueblo bobo. Ta un pueblo cu tambe kier mira algo real y un gesto practico, un propuesta real pa por yuda den su desaroyo completo.
“ E politiconan tin cu tuma na cuenta locual ta e herida di pueblo, no solamente e parti material pasobra den e parti aki nos no ta malo. Pueblo di Aruba ta un pueblo den prosperidad realmente, pero politiconan tin cu tuma na cuenta tambe di ki manera nan ta yuda e pueblo aki pa reconstrui locual a bira un ruina, principalmente e matrimonionan, e casnan di famia.
“ Di ki manera nan ta duna atencion na parehanan, a base di ley, a base di algun conseheria cu por tin, a base di algun acceso di conseheronan den caso di crisis y di problema, pasobra por lo pronto e unico solucion cu gobierno ta ofrece ta divorcio.
Y esaki no ta un ayudo sino cu esaki ta devora nos pueblo, aruinando parehanan, famianan y en consecuencia e muchanan ta keda cu heridanan profundo cu ta expresa despues den rebeldia y buscamento di auxilio den droga y den e mundo scur di anochi”, Pader Szpila a expresa.
“ Pues, mi ta kere cu pueblo mester principalmente di un atencion pa locual ta e calidad di bida den sentido comunitario, den sentido di balornan humano y spiritual. Mundo di politica tambe tin cu garantiza e pueblo un desaroyo asina, pues integral, no solamente verf cas sino wak kico ta sosodiendo den su paden, con hende ta biba cu otro y di ki manera nos por yuda nan comunion, nan paz y armonia”, Pader Szpila a bisa pa conclui.
