Diario Online

Paga pa drenta Parke Arikok tambe si kier bai Restaurant Boca Prins

Publication: Saturday, 22 August 2009. Categoria: Economia,General

ORANJESTAD (AAN): DIARIO a tene un entrevista cu Sr. Ambrosio “Booshi” Curiel, director di Parke Nacional Arikok riba e caso den corte entama door di un comerciante cu tin su negoshi den e area cu ta cay maneha pa e parke.

Ta asina cu mester a cuminza cobra pa drenta tereno di Parke Nacional Arikok prome di Augustus pero esaki no a sigui. Prome cu yega na e negoshi di e comerciante mester paga pa drenta parke. Esaki e comerciante ta haya cu ta inhusto y pesey a entama un caso.

Segun Ambrosio Curiel, e negoshi di restaurant cu tin na Boca Prins a sinti cu e cobranza na porta pa e tarifa di conservacion di Parke Arikok lo trece problema pa su negoshi door cu e hendenan lo mester gasta mas hopi pa por drenta parke y bay restaurant.

E doño su ponencia, a agrega, ta para tambe cu tin hopi hende cu ta bin directamente pa su restaurant y no parke. Parke Nacional Arikok ta mira esaki di otro forma pero na corte preguntanan a bay bin hunto cu huez.

Di dos banda a mustra cu berdad FPNA a haya permiso pa cuminza cobra entrante 1 di Augustus, pero pa motibonan organizatorio y falta di algun documento cu ta den keda cla, nan no por implementa e permiso ey ainda, a señala.

Booshi Curiel a menciona cu parke ta grandisimo, hopi ley a worde traha y mira den un contexto di parke, pero ora cu yega na ehecuta cierto plannan, semper mester acudi back na e comienzo di e landsverordening of landsbesluit di Fundacion Parke Nacional Arikok.

Mayoria di e articulonan aki ta manda nan back na varios instancia cu tin di haci cu leynan di Aruba y leynan legislativo cu ta worde poni na otro, a señala.

FPNA tabata tin hopi tempo trahando den e parti di transformacion y financiamento pero ta te na 2007 cu a bira bon cla cu e financiamento a keda cla y cu nan lo ehecuta nan plan, a indica.

Ta cierto leynan y a dura mas cu dos aña pa haya e resultado final cu tur e consehonan y puntonan cu tin di haber cu cierto aspectonan di e landsverordening FPNA.

Pa loke ta e caso specificamente, a manifesta, na cierto momento, door cu nan no a cuminza cobra ainda, no tabata tin motibo pa cualkier decision pasobra e estorbo no a cuminza.

E ora ey, a bisa, huez a propone un schorsing pa nan por a yega na otro y basicamente loke nan ta referi na dje ta e caminda publico cu tin den parke. Esun cu ta core di San Fuego pa Vader Piet y e negoshi ta keda practicamente pega cu e caminda na cierto punto den parke.

E ley di establecimento di PNA ta bisa cu caminda parke ta rigi riba full e teritorio duna na PNA menos e caminda publico cu tin den parke. Kiermen esaki ta den ley y ta cu otro landsbesluit e por worde cambia.

E ora no tabata tin motibo pa huez duna sentencia. Nan a yega na un sorto di acuerdo, a duna di conoce.

Lo a pone na entrada riba e anuncionan cu PNA tin cu esunnan cu ta riba caminda publico y esun cu ta bay na e negoshi lo no worde cobra. Mientras tanto, tur otro camindanan den e parke, e bishitante mester tin un prueba cu a paga of un entrada valido.

Esey kiermen cu e control na PNA a bira mas hopi y fastioso pa tur hende. Mester respeta ley y esey ta un di nan prome metanan. “Nos ta akinan pa conserva naturaleza a base di tur e leynan existente y leynan cu lo mester bin den futuro pa fortifica derecho di existencia di parke como tal”.