Home Economia Poder di compra: te unda mi placa ta yega?

Poder di compra: te unda mi placa ta yega?

2
0
SHARE
- Advertisement -

avpORANJESTAD (AAN): Bo lista di compras ta largo, paña pa e aña escolar nobo, material pa school, keds y hasta un hero di strika nobo pa reemplaza esun cu a kibra. Poder di compra ta e balor di bo placa ora bo midi e cantidad y e calidad di producto y servicionan cu e por cumpra, asina Michelle Winklaar di Partido AVP a enfatisa. E ta referi na e discusion cu tin ultimamente riba e fenomeno di nos poder di compra cu a bay atras considerablemente.

Den varios estado na Merca a introduci un “Sales Tax Holiday” den fin di siman pasa pa asina promove compra di articulonan pa school bou di e consumidornan. Esaki a resulta den un efecto masha positivo pa e economia den dos sentido.

E prome ta pasobra e ta aumenta poder di compra pa nan por cumpra e productonan cu nan mester, pues den otro palabra nan placa ta rende mas. Na di dos lugar, e comerciantenan tabatin oportunidad pa bende mas, di e forma aki yudando negoshinan sobrebibi den e temponan dificil na unda ta papia di un crisis economico.

Locual tambe a sosode ta cu e consumidornan no solamente a cumpra material pa school, sino a probecha pa cumpra otro productonan cu no tabata ni inclui den e “Sales Tax Holiday”. Di con? Pasobra ora bo placa ta rende mas, bo “consumer confidence” tambe ta crece, pues bo ta sinti bo mes mas comfortable haciendo compras.

Aunke cu un famia no ta confrontando retonan financiero den forma directo, toch nan lo por stop di cumpra cierto productonan pasobra nan no ta sinti e necesidad awor pa gasta tanto placa den momentonan asina.

Esaki riba su mes por crea un circulo visioso, cu pa falta di confianza di e consumidornan, henter e economia ta sufri. Gobierno ta hunga un rol masha importante den crea e confianza aki y tin un cantidad di hermentnan na su disposicion pa stimula economia y aumenta e confianza di consumidornan.

Michelle Winklaar a splica cu e plan di Partido AVP pa elimina BBO ta solamente un ehempel cu sigur lo tin un efecto positivo pa e economia di Aruba. Eliminando BBO den fase, consequentemente reduciendo e costo di producto y servicionan, e poder di compra ta aumenta. Den otro palabra….e consumidor lo tin mas placa pa gasta ora cumpra producto y servicionan y mas placa lo worde injecta den nos economia.

Por ehempel, si elimina 3% di BBO, e consumidornan lo sa cu prijsnan mester cuminsa na baha cu por lo menos 3%. Ainda nos no ta teniendo na consideracion e eliminacion di e efecto cumulativo cu BBO tin.

Pues den otro palabra, consumidornan lo por scohe unda pa cumpra nan productonan basa riba kende ta baha nan prijsnan. Ora consumidornan tin un opcion pa scohe, prijsnan lo fluctua mesora.

Di con esaki ta importante? Michelle Winklaar di Partido AVP a contesta cu ora nos economia ta bay bon, nos tur ta bay bon. Gobierno na su turno por inverti mas placa den schoolnan, careteranan, polis, hospital y otro proyectonan comunitario. Negoshinan ta tuma hende nobo na trabao y por paga mas salario.

Nos tur ta biba mihor ora cu nos economia ta bay bon. “Esaki ta un prome paso den crea un mihor Aruba, un destinacion turistico cu lo atrae bishitantenan di calidad superior cu lo gasta mas ora nan ta di bishita riba nos isla. Esaki ta e plan di Partido AVP na e pueblo di Aruba”, asina Michelle Winklaar a duna di conoce.

- Advertisement -

DUNA COMENTARIO

Please enter your comment!
Please enter your name here