Home Politica Pueblo ta pidi pa respet pa otro durante entregamento di lista

Pueblo ta pidi pa respet pa otro durante entregamento di lista

1
0
SHARE
- Advertisement -

entregalista1ORANJESTAD (AAN) – Manera ta conoci awe, diabierna 7 di Augustus tin entregamento di lista na Censo, di e diferente partidonan politico cu lo competi cu otro durante e siguiente eleccion Parlamentario, riba di 25 di September proximo.

DIARIO a ricibi diferente yamada di ciudadanonan cu ta pidi tur partido politico y nan seguidornan pa uza nan sano huicio y no provoca ningun incidente, y pa e politiconan mes cu por ta a worde movi na un lugar mas atras riba lista y nan no a keda contento, pa no tin “rancamento di cabuya” pa tur cos bay nechi, manera pueblo Arubiano kier pa e sosode.

Despues di mañan ya ta cuminza e temporada mas “cayente” di campaña y nos pueblo ta desea pa e discursonan politico di cada un candidato ta di nivel, sin insulta otro, sin saca paña sushi di otro, sin envidia ni calumnia, pero un campaña cu discursonan sano, no di odio ni tiramento di falta pero mas bien di union, pasobra ta Aruba y su progreso mester ta e centro di nan atencion y di nan programa di accion.

Den pueblo por nota cu e hendenan berdad a cansa di promesanan cu despues e politiconan no ta cumpli. Nos hendenan ta prefera e palabranan sincero y cu e politiconan por convence nos comunidad cu nan ta bay haci henter nan esfuerzo pa saca nos pais dilanti, y pa vence tur e obstaculonan cu ultimamente a presenta, tanto debi na circumstancianan di pafo como interno mes.

Algo cu tambe diferente hende cu a contact nos redaccion kier pidi e seguidornan di e diferente partidonan, ta cu si nan ta bay duna nan apoyo ora di entrega lista, cada ken respeta e color politico di tur hende cu ta para banda di un of otro partido, y pa por fabor no consumi bebida alcoholico tanten cu duna e partido of candidatonan apoyo.

Cosnan por bay for di man ora cu tin hende bao influencia di alcohol cu na dado momento por cuminza tira palabra mahos of insulto pa esnan cu no ta comparti nan color politico. Corda un y tur cu ta Aruba ta e pais di nos tur y cu ta su bienestar mester bin na prome lugar!

- Advertisement -

DUNA COMENTARIO

Please enter your comment!
Please enter your name here