Home Economia Rescata fondo di pension AOV

Rescata fondo di pension AOV

4
0
SHARE
- Advertisement -

kvkORANJESTAD (AAN) – Den entrevista cu señor Leo Maduro, consehero di maneho pa Camara di Comercio, el a elabora tocante e temporada di campaña pa eleccion di un gobierno nobo, riba dia 25 di September proximo y KvK su vision pa e gobernacion cu lo ehecuta e mando den e periodo 2009-2013.

Maduro a referi na un punto hopi importante cu segun KvK den e ultimo añanan no a haya suficiente atencion y cu realmente mester tabata un decision caba riba ki rumbo Aruba ta bay.

Esaki ta e desaroyo demografico cu nos pais ta experienciando ya cu den e ultimo 20 añanan Aruba su poblacion a crece hopi.

“ Parti di e poblacion aki a bin di afo y ta trata di hende di cierto edad caba. Pues, nos no tabata cuidadoso di dje pasobra nos no a laga hende hoben so drenta. Aworaki nos ta bay haya un envehecimento di e poblacion acelera, pasobra tin hopi hende cu a bira ciudadano Hulandes caba, cu tabata tin 40 pa 45 aña caba e tempo ey.

“ Nan tin 15 aña na Aruba caba, kiermen nan ta birando 60 aña y nan ta bay cu pension si nan por, pasobra nan tin un pension parcial so. Nos tin un grupo grandi pa bay atende eynan.

“ Esey ta haci cu e gastonan di AOV ta subiendo drasticamente y e proyeccionnan cu tabata tin pensa cu e fondo di AOV ta keda bashi na aña 2020 el a baha te 2017 y aworaki te hasta mas prome.

“ Pues ki ta pasa ta cu esaki ta e ultimo periodo di gobernacion, entre 2009 cu 2013 unda decision clave mester bay cay con nos ta rescata y salvaguardia nos fondo di pension. Kico extra nos ta bay haci pa e grupo grandi cu mas awor lo tin, cu ta mas cu doble cu e ta aworaki, cu tin 60 aña con nan ta bay biba.

“ Nan mester di un pension adicional cu necesariamente lo mester bin for di e saco di e hendenan mes, pues e trahadornan y di e otro banda tambe: e empresario”, segun sr. Leo Maduro a señala.

El a sigui bisa cu e aspecto aki mester di un plataforma nacional pa worde discuti y loke a falta hopi den e añanan cu a pasa ta cu solamente den caso di un emergencia masha grandi, gobierno tabata dispuesto pa sinta na mesa cu e gremionan.

“ For the rest, loke bo ta supone cu ta normal den un pais, ta cu regularmente bo ta sinta cu e partinan social riba tur sorto di tema cu tin cu discuti. Esey lo mester tuma lugar, pasobra esaki ta e ultimo chens den e gobernacion cu ta bay bin, pa realmente e decision clave keda tuma.

“ Esey por ehemplo, e necesidad pa hisa e edad di pension. Na e momentonan aki di eleccion, naturalmente e partidonan politico no ta mucho dispuesto pa bay discuti esey como tema di campaña.

“ Pero pa un Institucion manera Camara di Comercio eleccion of no eleccion, campaña of no campaña, esey no ta impedi di nos cu nos si ta trece dilanti e necesidad aki”, Leo Maduro a remarca.

- Advertisement -

DUNA COMENTARIO

Please enter your comment!
Please enter your name here