ORANJESTAD (AAN)- Ayeramerdia DIARIO a ricibi varios yamada di personanan di San Nicolas cu ta masha rabia mes pa motibo cu bestuurskantoor ta cera.
Segun e habitantenan ayera bestuurskantoor a habri pa un paar di ora so ya cu e unico cahera cu ta trahando a bira malo y nan mester a cera e lugar. Den oranan di merdia tur esnan cu a bay paga nan recibonan di coriente y awa a haya e lugar cera.
Por a compronde cu Elmar tambe ta cera pa motibo tin supuesto caso di fraude eynan y a dicidi di cera e lugar.
E departamento di Censo tambe ta cera ya cu e departamento na San Nicolas ta cera tur Diamars y Diahuebs pa motibo cu ta un persona so tin ta traha eynan tambe y nan ta exigi e trahador aki pa traha na oficina principal na Playa tambe.
E habitantenan ta reclama cu nan tambe tin mesun derecho cu e resto di pueblo di Aruba ya cu nan tambe ta pagador di belasting y cu nan ta haya un trato asina.
Ta spera pa pone mas atencion na e situacion aki ya cu no por ta cu den e ciclo moderno aki ainda tin mal maneho den e departamento gubernamental.
