Home Politica Importancia di un pueblo uni y bon educa

Importancia di un pueblo uni y bon educa

0
0
SHARE
- Advertisement -

ORANJESTAD (AAN): Ya for di tempo di Romanonan importancia di un pueblo bon educa tabata  bisto y tabata e afan di e lidernan di e temponan ey.

Un di e condicionnan mas importante pa progreso di un pais ta un comunidad fuerte y uni. Un comunidad cu tin confianza den su propio cultura, su potencial y su institucionnan politico. Na e momentonan aki tin un falta di confianza den nos institutonan politico y democratico.

   Despues di 8 aña di gobernacion di MEP no tin confianza mas den e imparcialidad di nos institutonan gubernamental. Nombracionnan politico ta na ordo di dia, Friends & Familiy a bira un titulo riba su mes, e fam netamente Arubiano Croes ta worde constantemente asocia cu  politica incorecto. Mi difunto welo, un homber recto ta bolter den su graf di berguensa con su fam cu el a carga cu tanto orguyo ta worde lastra.

    Un comunidad fuerte: Aki na Aruba nos tin un gobierno cu enbes di uni ta polarisa e pueblo. E gobierno di MEP no ta busca un union entre esnan cu ta biba riba Aruba, si no mas bien ta haci den tur su actonan un diferencia entre nos propio hendenan y tambe entre Arubiano y stranhero. Como cu e propio identidad no ta worde reconoci, y tin bes asta desmenti, ta hopi dificil pa reconoce e igualdad den cada persona. Ken ta Arubiano?

No ta solamente un pregunta cu un antropologo a haci na añanan ‘80, pero un pregunta cu te awe ainda ta resona. Ken tin mas derecho di tey aki riba Aruba, ken tin menos derecho. Nos ta en busca di nos mes identidad, y e ta dificil pa haya den e jungle di nacionalidadnan riba Aruba. Ainda mas ora cu e gobernantenan ta traha leynan discriminatorio y ta apoya abuso di straheronan.

Pa ta un comunidad fuerte no mester tin mas duda den nos identidad, ni den nos cultura. Tur cu ta biba riba e baranca aki, y cu ta stima Aruba y kier forma su hogar aki, mester sinti cu e ta Arubiano. No di nacemento, porta ni pa nationalidad, pero pa e condicion cu ta amor pa nos pais.

   Conecimento di nos propio cultura no ta encera menosprecia esun di e otro, si no door di acepta cu e otro ta diferente, y pa e motibo ey no menos bon of bunita. Mas conocimento di nos cultura y nos balornan ta ofrece un oportunidad mas pa realisa nos balornan miho, y pa aprecia esaki como un identidad comun. Una vez cu e ‘strahero’ y su cultura worde acepta como diferente, sin miedo di por interferi cu e propio cultura, e confianza di e propio identidad lo bini back.

   Den esaki politica y politiconan tin un papel pa educa e pueblo. Un educacion estadistica di e pueblo, pa e pueblo aki no hundi den ideanan di miedo di desparce. Un educacion di un pueblo riba e balor di comunitarismo, di democracia, di nocion di ciudadania, estado di derecho, igualdad di cada ser humano, derechonan humano, obligacion di cada un y di liberdad pa expresa bo mes. E principionan aki ta e minimo cu un Arubiano di generacionnan of un Arubiano nobo mester kere den dje, si e kier ta parti di e comunidad aki.

Nos hubentud mester worde confronta cu preguntanan cu a traspasa tempo, ideanan cu a influencia nos politica, nos manera di pensa. Cu un educacion asina por forma hobennan pa bira lidernan y estadisticanan, cu no lo ta limita na simplecidadnan manera yiu di ken bo ta, ken ta bo padrino, cuanto % Arubiano bo ta.

Pa por educa un pueblo asina, hopi capacidad ta nesecario, tambe hopi sabiduria, pero mas cu tur cos fe den e union y forsa di e comunidad. Esaki ta calidadnan cu personanan cu ta den politica pa probecho personal, pa eherce ideannan radical of demagogico no tin. Hopi di e gobernantenan cu ta bisa di ta guia e pais aki no tin e calidadnan nesecario pa uni e pais, tampoco pa haci e pais aki un pais suficientemente fuerte pa sobrevivi e crisis nos dilanti.

Un crisis economico, y un crisis social cu nan no ta prepara pe, ni a prepara nos pais pe. Ta pesey cu mester bin un gobierno drechi di hendenan califica cu por drecha loke a worde daña. Partido AVP tin e plan y e team pa por haci e trabao titanico cu tin nos dilanti y ta para dilanti e reto di un bes mas rescata e pais aki.

- Advertisement -

DUNA COMENTARIO

Please enter your comment!
Please enter your name here