Home Politica E forma pa desaroya San Nicolas pa turismo

E forma pa desaroya San Nicolas pa turismo

2
0
SHARE
- Advertisement -

ORANJESTAD (AAN): Diaranzon anochi a tuma lugar e programa di online TV Your Vision 2009 caminda e topico tabata desaroyo di San Nicolas y vecindario. Janiro y Izaira a yama bon bini na Otmar Oduber un biaha mas y tambe e invitadonan special cu tabata Mike de Meza, Carmelita Haynes y Clarisca Velasquez. No tin otro palabra pa cataloga e programa aki sino como un exito total caminda a papia detayadamente riba e situacion di San Nicolas y specialmente kico AVP den su Plan Aruba A’riba lo ehecuta pa mehora e situacion di pariba di nos isla.

Manera por a spera e promer pregunta cu a bin dilanti ta cu San Nicolas semper durante eleccion ta haya tur atencion, pero despues ora drenta gobierno, e ta bira e ultimo riba lista. Otmar Oduber riba esaki a bisa cu e frase aki mas bien a bira un cliché politico. E mes diferente biaha den conversacion cu entre otro Mike de Meza y Carmelita Haynes a brainstorm riba cual ta e mihor forma pa duna en berdad e realce di berdad (y no via promesa) San Nicolas merece y haya henter un desaroyo pa haya un digno biba pa esunnan cu ta biba pariba di nos isla.

Pesey den e programa Aruba A’riba ta pone un enfoke hopi special pa San Nicolas, mescos cu a sosode durante e gobernacion anterior di AVP caminda cu hopi a worde haci pero cu lamentablemente den ultimo 8 añanan no tabatin continuacion pa yega na e bista mas macro di loke tabatin pa San Nicolas.

Aki Otmar Oduber ta menciona p.e. Joe Laveist Sport Park, entrada di San Nicolas, e approach road, e inicio di e civic spine cu lo mester crea henter un curazon nobo pa San Nicolas caminda mayoria di e terenonan for di pabou di e bus stacion te Joe Laveist a bira esaki. Tambe e ta menciona e parkenan di recreaccion cu a worde traha tur rond di San Nicolas, Piscina Olimpico, Piscina Comunitario. Es decir e tabata bayendo riba un caminda hopi positivo, pero lamentablemente durante 8 aña el a ‘die out’.

Continuando Otmar ta indica cu fuera di un bus stacion cu a dura como 7 aña pa bin cla y un centro medico cu ta un bon idea laga atras, pero cu lamentablemente bou di Booshi Wever no a cristaliza ainda den un centor cu mester duna tur e servicionan pa pueblo di pariba, net nada a worde haci. “Awor a yega momento pa pick up the pieces for di 8 aña pasa. A yega momento pa crea desaroyo sin priminti cosnan falso”.

Riba e aspecto di turismo, Otmar Oduber a indica cu e forma cu por desaroya San Nicolas ta door di cuminsa usa San Nicolas como e unico area cu a keda nos cu por representa loke Aruba ta suppose di ta pa su turismo: un isla Caribense. E parti pabou ta worde cataloga pa e politico di AVP como un ‘concrete jungle’ y hasta por bisa cu el a bira manera un little Miami y tur esaki lubidando tur e aspectonan basico y bunita cu San Nicolas tin.

Dunando algun ehempel e ta menciona e Watertoren cu awor aki ta casi cay den otro, cual na momento cu e worde drecha e por bira un di e trademarks pa por presente, mercadea, hinke den revistanan. Mescos ta e caso di e cuebanan, minanan, etc. Esaki mester tuma lugar, pasobra lamentablemente awendia e encuestanan ta mustra cu ni 25% di e turistanan sa cu Aruba tin un parti cu yama San Nicolas siendo cu ta ey practicamente tur nos atraccionnan ta hinca.

“Mi ta kere cu via turismo mester bay crea un cantidad di desaroyo pa San Nicolas”. Otmar ta indica tambe cu un di su ideanan cu ta worde sosteni pa partido ta pa bin cu un commuter airport pa San Nicolas. A traves di esaki por crea un tipo di desaroyo cu ta bay haya un ripple effect. “Bo mester bin cu un desaroyo cu ta cuminsa chikito, pero cu ta haya un ripple effect di crea oportunidadnan pa trabao, crea diversificacion, crea e oportunidad pa hendenan establece negoshi eynan, crea cu taxistanan ta cuminsa move bay pariba, car rentals tambe lo ubica nan mes eynan E plan eynan ta uno mi ta kere cu nos mester bay dirigi nos mes pa bo bay crea e tipo di desaroyo cu nos ta busca pariba di nos isla”, Otmar Oduber a duna di conoce.

- Advertisement -

DUNA COMENTARIO

Please enter your comment!
Please enter your name here