ORANJESTAD (AAN) – Matutino DIARIO a entrevista señora Michelle Winklaar, candidato number 7 riba lista di Partido di Pueblo Arubano “AVP”, ken a pasa den fin di siman na diferente supermercado pa parti tas pa haci compra.
Esaki a sosode tanto na Playa como na San Nicolas unda por a mira e candidato conversa cu diferente persona mientras e tabata parti e tas.
Michelle a comenta cu el a haya hopi atencion pa e tasnan den e supermercadonan cu el a bishita y e ta kere cu hopi hende ta aprecia cu nan por bay haci compra cu un tas di un material duradero, cu no ta di plastic, y esey tabata e idea tras di e proyecto aki.
Tambe nan a trece un tiki ambiente den e lugarnan bishita unda cu e acogida tabata fantastico, segun Michelle a menciona.
E mensahe tras di esaki pa e consumidornan ta pa nan stop di uza e saconan di plastic y uza esnan duradero cu cual no solamente por haci compra, pero por use tur dia, hasta pa bay trabao y beach.
Patras di e tas señora Winklaar a pone dichonan cu e ta tuma hopi na curazon y cu ta yude inspira su mes den bida y esey e kier a comparti cu e consumidornan cu ta bay uza e tas aki.
El a subraya cu Partido AVP ta cla pa un cambio na September proximo y e ta ripara cu hopi hende kier deposita nan confianza den e lista aki, pasobra nan ta bisa cu e ta un real team, ya cu ta trata di 29 candidato cu diferente capacidad cu tur ta bin pa yuda e pais completo.
Ademas tin hende ta bisa cu por fin nan ta mira un team completo, pues no candidatonan cu ta actua individual, pero hunto cu por trece e cambionan cu nos pais mester. Fuera di esey diferente persona ainda ta papiando di e parada di Diadomingo 23 cu tabata inmenso y nan ta wardando riba e ultimo simannan di campaña cu AVP ta bay trece hopi actividad y con nan por trece nan plan di maneho dilanti.
