Turbo rotonde wayaca a yega su fase final
ORANJESTAD (AAN) – Matutino DIARIO a entrevista Ing. Jossy Kock, lider di e proyecto “turbo rotonde” di Wayaca, pa un biaha mas e duna informacion relaciona cu e trabaonan aki y ki dia e lo keda cla pa habri.
Ing. Kock a comenta cu for di momento cu nan a cuminza cu e construccion di e turbo rotonde aki, nan a confronta cu hopi dolor di cabes, specialmente e parti cu ta toca utilidadnan cu tin bao di caminda.
El a señala cu hopi hende a critica e aspecto aki pasobra nan a bisa cu trabaonan no ta tumando lugar, locual no ta e caso, sino cu ora di traha cu cable y linea di utilidad bao di tera, mester hacie cu cautela debi cu nan ta den funcion y si daña nan, lo por manda un bario completo for di servicio, locual nunca tabata e meta di e trabao aki.
Un bez cu e parti aki a keda cla, trabao a cuminza “full swing” cu awor ta den e fase final di e proyecto, segun ing. Kock a indica pero ainda tin un par di detaye pa completa, manera marcamento di caminda y e parti di aceranan cu mester worde asfalta pa asina por haya un trabao completo di e rotonde aki.
Despues di confronta cu contratemponan y di a lucha cu nan, e ta kedando cla. Ing. Kock a subraya cu nan ta satisfecho cu e trabao aki, cual ta costando alrededor di 2.6 miyon florin. Ta planea pa habri e turbo rotonde aki den e prome siman di September, pero si no logra, e lo sosode sigur den e di dos siman.
Kock a bisa cu rotonde ta un di e mehor solucionnan cu tin pa mehora nos situacion di trafico na Aruba, ya cu e ta regula e velocidad specialmente riba cruzada y e trafico por circula tambe mas lihe.
