Home General Un gran ciudadano y accountant a fayece

Un gran ciudadano y accountant a fayece

8
0
SHARE
- Advertisement -

ORANJESTAD (AAN): Un bida largo a bisa ayo. Un pilar fuerte den nos comunidad a doblega pa descansa den brasa di Señor na e bunita edad di 91 aña. Su imprenta di pia ta keda marka ariba diferente tereno: Su profesion di accountant e a eherce cu orguyo y dignidad.

Su sentido pa equidad (justicia) tabata asina halto cu e a yama su oficina di administracion y incasso ‘Equidad’; oficina cu el a maneha pa mas di 20 aña. Prome cu esei, den e mes ramo di accounting e a traha pa mas cu 25 aña na firma Jan C. Lacle N.V. na Santa Cruz.

E a casa cu Marianita Felepina Croes miho conoci como ‘Shon Marie’ y e matrimonio a dura 40 aña te ora cu morto a separanan. Den Santa Cruz e tabata hopi activo entre otro den Connie Francis Club y su interes pa asisiti a worde premia cu un nombracion como miembro honorario.

Su interes pa voetbal tabata grandi y asina e a keda varios aña activo como miembro y president di directiva di su team favorito di voetbal RCA. RCA a otorge despues e titulo di miembro honorario pa su valioso aporte.

Su gana pa aporta tambe a lage traha pa mas di 20 aña den directiva di tehuis van Ouden van Dagen. Pa su aporte na e club social Aruba Tivoli Club e a worde honra como Miembro di Honor. Door di su interes pa comercio den su totalidad e a traha pa hopi aña den directiva di Kamer van Koophandel y ATIA.

Tambe e a contribui na gobernacion door di a sirbi den Raad van Advies di Antiyas Hulandes y Raad van Advies di Aruba na 1986 ora nos a haya status aparte. Cu gran pasion e a sirbi su comunidad atraves di Aruba Lions Club.

Cu entusiasmo den Lions Club e a sirbi y tuma retonan local, regional y internacional. E a worde eligi pa varios funcion incluso presidente di club y a gana varios reconocimento pa su trayectoria leonistica.

E a worde eligi como un Gobernador di Lions di su distrito cu ta inclui teritorionan di Venezuela, Aruba, Boneiro y Curaçao, como candidato di club di Aruba. Esaki tabata pa di promer vez cu un miembro di club di Lions di Aruba a alcansa un funcion halto asina. Tambe el a worde apunta door di Lions International di Merca como Consehero International.

Pa su obranan na bienestar di nos comunidad Arubano, Su Mahestad La Reina a condecore como Officier den Orde di Oranje Nassau.

Oscar Marugg tabatin un hobby special: literatura. E a lesa masha hopi mes. E tabata tin un aprecio special pa su ruman Tip Marugg, un autor cu a publica varios buki cu exito y ta ganador di varios premio di literatura.

Pero ta poco ta esnan cu sa cu Oscar Marugg mes a skirbi 6 boeki pa su circulo cercano. E ultimo buki tabata 6 aña pasa na ocasion di a cumpli 85 aña cu tabata un autobiografia y alavez un despedida, den cual boeki a ta bisa cu sigur ta bunita pa biba largo, pero mas importante ta CON un hende a biba su bida!

Den su circulo familiar y amistad e tabata conoci como un bon tercio cu ta gusta hunga domino. Pero tambe e tabata worde respeta como un tercio corecto y ordena . Su nomber di cariño tabata Shon, pasobra e tabata un shon di hende.

Bibá semper den Playa den becindario di misa San Francisco, e tabata tin e pastornan di Playa, maske e mes ta protestant, semper como gran amigo. Nan tabata combersa hopi ariba topico di religion, bijbel y mundo spiritual.

Como bisawelo e a siña su bisanietonan :Dede pikinia ….cu su bisinja… Como welo pa su nietonan e tabata un amigo di confianza, un consehero y ariba un tono mas alegre e semper tabata conta su nietonan su charadanan.

Pa su yiunan kendenan semper a yame ‘Daddy” e tabata tene un Happy Hour tur Diasabra merdia na su cas. Su secretonan pa bira bieu, esta whisky y chuculati, no por a falta. Pero si e tabata corda tur presente cu tur cos, tambe whisky, mester ta na midi. No dimas ni di menos. E tabata un tata ehemplar cu norma y valornan halto.

Un bida largo y bunita cu en berdad na ora di morto ta trece momentonan di tristeza y emocional, pero en realidad tambe momentonan di celebra cu aprecio y alegria su grandeza, ehemplonan, apoyo, consehonan, bondad, afecion y calor, cu ta ancra den e pilar di bida eterno cu yama Oscar Marugg.

- Advertisement -

DUNA COMENTARIO

Please enter your comment!
Please enter your name here