Home Politica Un rumbo basa riba vision y planificacion pa un mihor futuro

Un rumbo basa riba vision y planificacion pa un mihor futuro

0
0
SHARE
- Advertisement -

Arthur DowersORANJESTAD (AAN): Arthur Dowers ta señala un tendencia negativo den e campaña aki, un desaroyo decepcionante comokiera cu ta hustamente e politico nobo den MEP, esnan cu a priminti un cambio den MEP a resulta di ta mal informa nos pueblo intencionalmente. Intimidacion, mal informacion y gañamento diariamente ta locual e campaña di politiconan nobo di MEP ta encera.

Como persona responsabel nos tur a siña cu cada paso cu nos tuma mester ta uno pa miho. Promer cu e paso aki worde realiza nos sa tambe cu nos mester haci pregunta, busca informacion concreto y corecto pa asina nos por tuma nos decisionnan. Decisionnan aki ta worde realiza a base di situacion actual, experiencia, vision, determinacion y hopi biaha basa ariba conseho.

Esaki sigur ta e caminda cu e persona cu ta kere den un calidad di bida halto basa ariba valor y normanan pa un mihor futuro ta cana. Di un hoben te na un adulto, di un trahado te na un empresario, di un ciudadano te na un mandatario esakinan ta keda e base concreto pa realiza hopi cos nan cu exito.

Tur rond di mundo tin cambio nan cu ta tuma lugar tur dia, cambio nan riba tereno economico, financiero, social, infrastructura, educacion y mucho mas.

Aki na Aruba tin hopi cambio desastroso cu a tuma luga pa e delaster aña nan den man di e gobierno actual. Door di e mal maneho di e gobierno aki nos por sinti un anhelo pa un cambio. E anhelo aki no por worde stroba pa mentiranan cu nos status aparte lo ta na peliger y cu nos eleccion parlamentario di 25 di September lo ta un referendum.

Cu Hulanda ta tur caminda na Aruba presente y nan ta gobernando Aruba for di Den Haag ta un hecho doloroso, pero un confirmacion cu Nelson Oduber no por goberna Aruba.

Partido AVP semper a lucha y traha duro pa un mihor Aruba. Un lucha cu a cuminza añanan atras cu un plan y un vision, un plan y vision cu a madura nos como un pais y como un pueblo. Un lucha determina cu a nace pa ta un pais autonomo den nos reino Hulandes bou di e nomber di separacion y cu a desaroya y a bira un realidad cu su status aparte. Un realidad cu a haci Aruba un pais mucho mas fuerte, un pais cu posicion firme den nos Reino Hulandes y un Aruba cu un vision di progreso.

Respet y elogio so tabata tin pa Aruba di otro partnernan den Reino. E respet aki a cambia den desconfianza bao di e gobierno actual, y a culmina den investigacion hudicial contra e actual gobierno.

E realidad aki no por worde scondi cu e mentiranan di partido MEP. Nos pueblo a uni masalmente den pasado pa un cambio, un cambio cu a uni nos pa logra cosnan grandi localmente y internacionalmente.

Nos status aparte tabata un simiya cu nos a sembra decada nan atras, un lucha cu diferente politico a sa di para schouder cu schouder pe. Awe un bes mas nos pueblo lo sa di uni pa un cambio cu saca nos for di gara di algun politico y personanan cu no tin gevoel pa nos pueblo sino unicamente pa nan saco.

- Advertisement -

DUNA COMENTARIO

Please enter your comment!
Please enter your name here