Home Politica Valero ta sera pa culpa di Nel Oduber

Valero ta sera pa culpa di Nel Oduber

8
0
SHARE
- Advertisement -

ValeroORANJESTAD(AAN): Dos aña pasa tabatin un proposicion riba mesa di Refineria Valero pa gobierno di Aruba. Valero tabata dispuesto pa paga 50 miyon pa aña na winstbelasting y tambe pa haci e inversionnan necesario di 1 biyon dollar pa modernisa e refineria hopi anticua. Esaki a cambio di un dispensacion di BBO riba exportacion.

Si no haya un cumprado, e refineria ta sera su portanan, cu tur e consecuencianan negativo cu esaki ta trece cune. Petrochina a mustra interes, pero a pone condicionnan inaceptabel.

Siman pasa Valero a anuncia cu e lo sera definitivamente su portanan. Prome Minister Oduber a bay medionan di comunicacion pa gaba cu e tin un solucion, pero e berdad ta cu e no por participa un par di siman prome cu eleccion na ningun hende e condicionan cu e cumprado aspirante Petrochina a pone riba mesa, esaki pasobra nan no ta acceptabel pa ningun hende.

Tabata un golpi economico masha fuerte mes tempo cu Lago a sera su portanan y a bandona e isla aki. E gobierno di AVP cu a bin despues a haya Aruba den un desolacion total cu miles di tata y mama sin trabao y hendenan cu na un cantidad alarmante tabata bandona nos isla, a dicidi e tempo ey di haci di Aruba un destinacion turistico.

Esaki a resulta di tabata un tremendo bon decision. Economia di Aruba a florece y e ingreso per capita a yega na un nivel masha halto mes, sigur compara cu otro islanan dan Caribe. Gabinete Oduber II a logra despues di atrae un compania pa habri y explota e refeneria di nobo, aunke cu pa haci esaki Nel Oduber y su gobierno mester a bende e alma di Aruba.

Coastal no solamente a haya un tax holiday, pero riba dje a haya un garantia di Nel Oduber cu nunca e compania aki lo worde poni responsabel pa cualkier daño medio ambiental; dus ora nan stop di haci uso di e refineria nan (Coastal) NO mester haci e tereno limpi di tur contaminacion!

Ta e mesun clausula den e garantia ta haci cu awe Valero tampoco mester haci e tereno limpi. E gastonan pa deshaci di e polucion ambiental – estima riba biyones di Florin – lo mester worde paga door di nos yiunan, nan yiunan y hopi generacionnan mas cu ta bin.

Algun aña pasa Coastal a bende e refineria cu Valero. Tabata mas cu claro e tempo ey caba cu mester di haci inversionnan basta grandi pa modernisa e refineria cu tabata den un estado masha decai mes, pa por hacie rendabel. E prijs cu Valero a paga – rond di 450 miyon dollar – tabata hopi abao.

Y cu den su man un tax holiday atractivo Valero a haci ganashinan grandi den cuminsamento. Pero, e inversionnan cu a worde priminti di lo worde haci, casi no a tuma lugar. Ta pa e motibo aki mes tambe cu awe ta casi imposibel pa haci e refeneria eficiente y pa den un tempo cortico reconstruye di tal forma cu e por procesa otro sorto di azeta y tambe cu productonan por worde produci eyden.

Ta pesey mes cu partido AVP si dos aña pasa a acepta e proposicion di Valero y a hinke den su presuspuesto alternativa. Nel Oduber a bari e proposicion aki for di mesa. E momento ey Prome Minister di Aruba por a mara Valero pa un tempo largo na Aruba, pero el a prefera di scoge pa un conflicto.

Valero no a perde pa gana y a cuminsa un caso den corte contra gobierno, cu den prome instancia a worde gana door di pais Aruba. Pero, awor a resulta cu e triunfo aki ta nada mas un victoria pirrico (un triunfo cu ta costa tanto energia, molester y placa cu e no ta bale la pena). Pasobra awor cu e refineria no ta bayendo bon, e claim latente di belasting di 300 miyon Florin ta un peso masha pisa pa Valero. Esaki ta haci e decision di bay di Aruba uno masha facil mes.

Awor Nel ta conta rond di ta bay “rescata” Aruba. Petrochina lo cumpra e refineria. Pero, Nel Oduber pa nada di mundo kier bisa si tin un deal si of no entre Valero y Petrochina. Pakico Nel ta asina keto anto? Loke cu Nel no kier bisa pueblo ta cu Petrochina kier cumpra e refeneria solamente bao di cierto condicionan. Condicionnan estricto cu ainda mester worde aproba door di Parlamento.

E condicionnan aki ta cu Petrochina kier paga un suma masha abao mes na winstbelasting y cu nan no kier paga BBO ni tampoco nan kier carga responsabilidad pa contaminacion y polucion di nos medio ambiente. E condicionan aki pa Aruba y tur esnan cu ta stima Aruba ta completamente inaceptabel! Esaki pa e simpel hecho cu nos no tin nada na un deal asina mahos.

Un biaha mas e pueblo di Aruba ta bira victima di e actitud negativo y e falta di vision di Gabinete Oduber IV. Centenares, of miho bisa miles di hende lo perde nan trabao den e dianan nos dilanti. Y mientras cu e limpiesa di medio ambiente ta causante di un debe grandi pa futuro di e pais aki, Aruba ta keda atras cu un desempleo gigantesco y un polucion enorme.

- Advertisement -

DUNA COMENTARIO

Please enter your comment!
Please enter your name here