Diario Online

Valero ta sigui shut down indefinidamente

Publication: Thursday, 27 August 2009. Categoria: Economia,Politica

E noticia a bin y dal manera un baño di awa frieu. Valero a laga sa Diaranzon merdia, cu nan lo stop mesora cu trabaonan di mantencion cu diferente Contratista ta ehecutando den e refineria na San Nicolas, y lo bay mantene e status di “shut-down” pa un tempo indefini.

Pabien Nel! Esaki a bira un otro logro pa bo! Ademas, el a bira e di dos biaha cu di berdad MEP ta conoce un cierre di refineria bao di su gobernacion! Cualkier hende cu bisabo un otro storia, bo sa mesora cu esey no ta berdad!

Simple y puro! Loke ta pasando aworaki cu Valero Aruba Refinery, ta muestra palpable cu MEP no ta un partido responsabel pa handle asuntonan cu tin di haber cu macro-economia di e isla. Nan tin un bista principalmente dirigi riba “logro short-term”, y esey tabata pa haya mas placa y placa den su caha… y no worry cu e partner strategico aki cu tin un refineria grandi y ta dunando hopi trabao na Arubianonan.

Pa ta sincero, na comienzo di gobernacion di MEP na 2001, tabata parce cu Gobierno nobo aki a bira un aliado grandi di Valero. Tirando un bista atras, ta cuminza pensa cu esakinan tabata djis un ‘amistad camufla’ djis pa saca potret y saca bunita articulo den prensa. Pero ta bisto cu atravez di añanan, e lista di prioridadnan pa e maneho di Gobierno enfrente Valero a cambia drasticamente.

Dado momento, hasta por a sinti cu MEP a tuma e mesun posicion vengativo cu e tin contra hopi compania na Aruba. Un biaha mas, e sentimento “anti-capitalista” di partido geel a bin bek ariba, y a vomita riba e futuro di Valero. Esaki a cristaliza ora cu Gobierno di MEP a dal e candal pisa di BBO riba Valero.

Un biaha mas, Valero tabata e “boe-man” pa MEP y Nel. Envez di pensa riba e beneficio “island-wide” cu un partner strategico manera Valero, unda por sigui stimula e desaroyo pacifico entre compania y gobierno.. a busca forma pa keda pusha e compania y su gerencia na San Antonio den un skina unda no tabatin salida, y casi no por a hala rosea.

Pero MEP tabata asina sigur cu nan lo a gana e handwrestling aki cu Valero, y no tabata ni preocupa pa yega na cualkier consensus of traha un deal, y purba pa mantene e compania operando, salbando miles di trabao di Arubianonan.

Sinembargo net lo contrario a socede. MEP a djis keda para tof, sperando cu Valero lo bay doblega. Hasta ora cu Valero a anuncia recien cu nan ta bay shut-down pa 3 luna, ainda por a tende Nel y su militancia ta keda insisti cu e compania tin di cumpli, etc.

Awor? Tin indicacion cu ni maske Nel pone sucu riba e herida, e deal lo no por funciona pa prome cu 31 December 2009, cu e Refineria lo saca huma atrobe for di schoorsteen.

Consecuencia di e anuncio di Diaranzon merdia, ta cu como 80% di e forza laboral di Contratistanan lo no tin nada otro di haci, sino haci nan lockernan bashi, y sali for di e refineria, bisando “Danki Nel, great job!”

Kico Gobierno lo haci pa e 600 y pico trahador cu awor a bin haya e baño di awa frieu, cu nan temporada di fin di aña ta den incertidumbre? Pa MEP, e peor asunto ta cu esaki ta socede net awor cu falta menos di un luna pa eleccion, y esaki ta un relacion publico desastrozo pa nan campaña.

Anteriormente, e anuncio di e refineria cu nan lo keda djis ta haciendo trabao di mantencion, a calma e curazon di hopi trahador cu a pensa cu nan lo bay ta keda cu salario pa por lo menos e proximo lunanan. Pero e bunita storia ey, a cay kibra na werki ora cu e refineria a laga e bom cay riba Diaranzon.

Un sugerencia cu a scucha Diaranzon mes, ta cu Nel por mustra sikiera cu e tin ‘goodwill’ y informa Valero cu nan por coy kizas 1/3 parti di e miyones cu tin poni den e Escrow-Account pendiente pa BBO, y usa e placa aki pa asina sikiera mantene e 600 pico trahadornan aki na trabao pa por lo menos asina nan lo por tin un Pasco trankil cu nan famianan.

Den corto plazo, e impacto economico pa Aruba relaciona cu e shut-down di Valero Aruba Refinery, awor ta bira mas grandi! Tempo di cierre di Lago, bon mes cu un Gobierno a bin y a dicidi na rescata e isla door di pusha tur hende bay traha den mundo di Horeca.

Pero awor na 2009? Unda Nel lo bay hinca e 600 y pico trahadornan cu ta sin empleo awor? Varios Hotel ya caba ta dunando nan trahadornan extra-day off debi cu e grado di ocupacion no ta cos di canta macamba. Pa colmo, ningun di e Hotelnan cu MEP a priminti pueblo cu nan lo construi pariba di brug, y tambe Ritz-Carlton, no tey tampoco pa pusha nan aden.

No a keda ningun alternativa, pa nombra e “Shutdown Total” aki di Valero, como un di e Top 10 Logronan di Nel Oduber. Pabien, y disfruta di dje!