Home Social “Bek na mi raiznan”, un evento y celebracion unico!

“Bek na mi raiznan”, un evento y celebracion unico!

2
0
SHARE
- Advertisement -

Concierto netamente crioyo

edjean_semeleer_1ORANJESTAD (AAN): Exactamente aki un luna lo tin e celebracion grandi y memorable di e cantante aki su 15 añanan den e mundo farandulero.

E significacion simpel di e nomber di e proyecto aki, ta cu e artista lo bay back na e lugar y riba e escenario caminda tur cos a cuminsa oficialmente p’e 15 aña pasa.
Tabata na aña 1994 cu Edjean Semeleer ta subi e escenario di Cas di Cultura pa prome bes y ta canta representado su school di e tempo ey cu tabata Pius X School, dilanti un publico cu p’e tabata grandisimo, realisando su soño di mas grandi, cu ta di bira un artista.
E evento tabata e pre final di e festival popular y tan gusta, Voz-i-Landia.
Hopi ainda tin bibo den nan memoria e momentonan memorable ey.
Desde e dia aki, Aruba a mira un streya nobo cuminsa briya.
15 aña despues nos por mira back riba un carera sumamente impresionante y exitoso di un di e cantantenan local di taya, mas stima y popular den pueblo.
“Bek ta mi raisnan” ta e nomber cu lo refleha cu cada persona ta conciente unda e kier bay den futuro, pero cu nunca e tin cu lubida for di unda el a bin. Esaki sigur ta e caso cu e artista hoben aki. Pa tur esnan cu conoc’e, sa bon cu e ta “hende di tur hende”, cu e ta un ser humano hopi critico, pero tambe hopi agradecido pa tur loke el a logra y na tur esnan cu di un manera of otro a yud’e logra su soñonan.
Ta hopi notable cu ainda Edjean ta un hoben, cu apesar di su edad a logra di realisa hazañanan cu pa hopi tabata mustra imposibel. Esaki sigur ta sirbi como ehempel sumamente positivo pa hopi otro, pero tambe pa otro artistanan cu tambe ta ambiciona di un dia logra di yega asina leeuw of te hasta mas leeuw.
Diabierna, dia 2 di Oktober proximo, Cas di Cultura lo bisti completamente di gala pa asina Edjean por celebra cu su pueblo y fanaticonan fiel, e logronan y exitonan di su 15 añanan den farandula.
A prepara un repertorio cu lo repasa 15 aña di exito, a confirma presencia di artistanan di taya invita cu indudablemente lo hala masha hopi atencion, un escenario cu lo worde completamente transforma, pa asina sorprende, pero tambe entretene e publico te na su maximo.
No solamente esaki tin planea pa e anochi aki, sino mucho mas. Entre otro, pa duna danki y honor tambe na tur e personanan cu a yuda Edjean yega caminda cu e ta awe. Esaki sigur lo ta un lista masha largo di nomber, pero ta algo cu no por laga afo.
E anochi aki lo pone tur enfasis riba e artista local y su logro y capacidadnan. Pues publico lo no ta solamente disfrutando di un espectaculo di kita sombre, pero tambe ta apoyando su propio talentonan cu lo ta e focus principal di henter e anochi.
Pa esnan cu ya for di 2006 ta experenciando conciertonan di Edjean, sa hopi bon di e calidad y variacion excelente di su espectaculonan , y ta na altura tambe cu esaki lo bira atrobe un concierto espectacular cu cada persona lo disfruta lo maximo di dje.
Pues nos ta invita bo pa keda pendiente pa tur otro informacion cu nos no a duna bo awe. Esaki tabata pa bo djis reserva e fecha aki den bo agenda. Muy pronto nos lo anuncia un pa un, tur detaye di e anochi aki, cu ta priminti di bira otro evento historico presenta pa Edjean Semeleer.

- Advertisement -

DUNA COMENTARIO

Please enter your comment!
Please enter your name here