Rene ‘Baba’ Herdé
Principio di bon gobernacion a worde trapa door di MEP!!!
ORANJESTAD (AAN): No tin fin na e abuso di MEP cu placa di pueblo di Aruba. MEP ta kere di berdad cu tan an placa e ta y cu nan por haci cu ne loke nan kier. E cantidad di hende cu MEP ta nombrando tur dia den gobierno a sobrepasa tur record. Contra tur ley, sin cu tin placa riba presupuesto, sin pasa e proceduranan legal y sin cu tin vacatura den departamentonan, gobierno di MEP ta sigui nombra hende prome cu eleccion.
Siman pasa so a nombra mas o menos 70 hende extra. Y nan no ta polis of maestro di school manera MEP kier pa nos kere. Tin biaha hasta ta hende cu tin trabao otro caminda caba pafor di gobierno. MEP kier haya nan voto y pesey ta nombra nan den aparato di gobierno.
E tristo ta cu MEP no tin cunes si por paga e salario y beneficionan di e hendenan aki of no. Nan ta dal bay y ta e gobierno nobo di Aruba cu sinta na fin di October lo mester wak con ta haci. Al fin ta e pueblo di Aruba cu tin cu paga pa e abusonan aki! Esaki ta pakico MEP no kier kita BBO y kier bay hisa e BBO te na 6%.
EX-MINISTER Y EX-PARLAMENTARIO: Tin tur indicacion cu un ex-minister di MEP y un ex-parlamentario cu no a bolbe riba lista di MEP a haya mas cu djies un golden handshake pa nan mal trabao pa Aruba.
E dos personanan aki siman pasa a worde nombra den e posicion di ‘raadsadviseur’ di gobierno actual cu ta bahando. Y nan ta bay haya e salario y beneficionan mas halto den rangonan di gobierno. (Schaal 16). E function aki ta uno cu no tin oficina, ni descripcion di kico nan tin cu haci.
Considerando cu e gobierno aki ta bay cas dentro di un luna y cu esaki ta trata di nombramentonan netamente politico, e pregunta cu pueblo ta haciendo ta pakico ta nombra e hendenan den e function aki? Ta pa ken nan ta bay traha?
Na ken nan tin cu responsabilisa pa e placa di pueblo cu nan ta bay haya? Tin sospecho cu ta trata aki di sr. Frido Croes, ex- minister plenipotenciario na Hulanda y sr. Dirk Dumfries, ex-parlamentario di MEP.
E dos personanan aki lo cai bou di minister president Nel Oduber. Tur dos e personanan aki tabata traha den gobierno y e pregunta ta pakico nan no por bay back caminda nan tabata traha?
PETICION NA GOBERNADOR:
Na comienso di campaña partido AVP a haci un peticion formal na Gobernador di Aruba, sr. Fredis Refunjol, pa para e tipo di nombramentonan netamente politico aki y di no permiti pa sigui abusa di placa di pueblo manera MEP ta sigui haci te den porta di eleccion.
AVP a bolbe ripiti e peticion aki y a enfatisa cu e nombramentonan aki, na momento cu pueblo ta sufriendo, na momento cu tin asina hopi hende sin trabao y muchanan sin school, na momento cu costo di bida ta asina halto, gobierno no por malgasta placa di nos pueblo na ‘friends and family’, na trikinan pa cumpra voto di hende. Un cos ta sigur, esta cu Pueblo si ta saca su som y para e tipo di abusonan aki diabierna awor ora nan bay vota!
